سوال: حضرت ! امید ہے کہ آپ خیریت سے ہوں گے۔
حضرت ! معلوم یہ کرنا تھا کہ اگر کسی شخص نے کچھ رقم صدقے کی نیت سے الگ کر کے رکھی ہوئی ہو، اور وہ شخص اسی رقم سے کہیں کچھ نیم کے درخت لگاتا ہے یا پیپل کے درخت لگاتا ہے، تو کیا اس کا صدقہ ادا ہوگا ؟

جواب: واضح رہے کہ جو رقم صدقہ کی نیت سے الگ رکھی گئی ہے، اگر وہ واجب صدقہ کی رقم ہے، تو اس رقم کے ذریعے درخت لگانے سے صدقہ ادا نہیں ہو گا، کیوں کہ واجب صدقہ میں کسی مستحق کو بغیر عوض کے مال کا مالک بنانا شرط ہے، البتہ اگر مذکورہ رقم نفلی صدقہ کی نیت سے الگ رکھی گئی ہے، تو اس صورت میں درخت لگانے سے نہ صرف صدقہ ادا ہو جائے گا، بلکہ حدیث میں اس عمل کو "صدقہ جاریہ" کہا گیا ہے۔