سوال: کیا فرماتے ہیں علمائے کرام اس مسئلہ کے بارے میں کہ ایک شخص نے 23 ستمبر 2016ء کو اپنی بیوی کو خلع دیا۔ پھر 27 ستمبر 2016ء کو تین مرتبہ کہا کہ ’’میں نے تجھے طلاق دی‘‘ عورت ایک مہینہ کے حمل سے تھی، عورت نے طلاق کے بعد حمل کو ضائع کروادیا۔ اس تمام تفصیل کے بعد آپ حضرات سے معلوم یہ کرنا ہے کہ اس عورت پر کتنی طلاقیں واقع ہوگئیں؟ اور عورت کے حمل ضائع کرانے سے طلاق کے واقع ہونے یا نہ ہونے پر کوئی اثر پڑے گا یا نہیں؟ اور طلاق واقع ہوجانے کی صورت میں عورت کی عدت کتنی ہوگی؟ اور عدت گزارنے کے بعد عورت کہیں اور شادی کرسکتی ہے؟

جواب: واضح ہو کہ خلع طلاق بائن کے حکم میں ہے اور طلاق بائن کے بعد عدت کے اندر طلاق صریح دینے سے طلاق صریح بھی واقع ہوجاتی ہے، لہٰذا اگر شوہر نے اپنی رضامندی سے خلع دینے کے بعد مزید طلاق دی ہوں تو تین طلاقیں واقع ہوکر حرمت مغلظہ ثابت ہوکر دونوں کے درمیان ازدواجی رشتہ بالکل ختم ہوچکا ہے۔ بلاعذر شرعی حمل ضائع کرانا غیرمناسب عمل ہے، تاہم عورت تین ماہواری گزار کر دوسری شادی کرسکتی ہے۔ حمل ضائع کروانے سے طلاق پر کچھ اثر نہیں پڑتا۔