سوال: مندرجہ ذیل واقعہ کی تصدیق فرمادیں: "حضرت دحیہ کلبی رضی اللہ عنہ نہایت خوبصورت تھے، تفسیر نگار لکھتے ہیں کہ آپ کا حسن اس قدر تھا کہ عرب کی عورتیں دروازوں کے پیچھے کھڑے ہو کر یعنی چھپ کر حضرت دحیہ کلبی رضی اللہ عنہ کو دیکھا کرتی تھیں، لیکن اس وقت آپ مسلمان نہیں ہوئے تھے۔
ایک دن سرورِ کونین تاجدارِ مدینہ حضرت محمد مصطفی ﷺ کی نظر حضرت دحیہ کلبی پر پڑی، آپ ﷺ نے حضرت دحیہ قلبی کے چہرہ کو دیکھا کہ اتنا حیسن نوجوان ہے، آپ ﷺ نے رات کو اللہ تعالیٰ کی بارگاہ میں دعا مانگی، یا اللہ! اتنا خوبصورت نوجوان بنایا ہے، اس کے دل میں اسلام کی محبت ڈال دے، اسے مسلمان کر دے، اتنے حسین نوجوان کو جہنم سے بچا لے۔ رات کو آپ ﷺ نے دعا فرمائی، صبح حضرت دحیہ کلبی رضی اللہ عنہ آپ ﷺ کی خدمت میں حاضر ہو گئے۔
حضرت دحیہ کلبی رضی اللہ عنہ کہنے لگے، اے اللہ کے رسول ! بتائیں آپ ﷺ کیا احکام لے کر آئے ہیں؟ آپﷺ نے فرمایا: میں اللہ کا رسول ہوں اور اللہ واحد ہے، اس کا کوئی شریک نہیں، پھر توحید و رسالت کے بارے میں حضرت دحیہ کلبی کو بتایا، حضرت دحیہ نے کہا، اللہ کے نبی میں مسلمان تو ہو جاؤں، لیکن ایک بات کا ہر وقت ڈر لگا رہتا ہے، ایک گناہ میں نے ایسا کیا ہے کہ آپ کا اللہ مجھے کبھی معاف نہیں کرے گا۔
آپ ﷺ نے فرمایا: اے دحیہ! بتا تو نے کیسا گناہ کیا ہے؟ تو حضرت دحیہ کلبی نے کہا: یا رسول اللہ! میں اپنے قبیلے کا سربراہ ہوں، اور ہمارے ہاں بیٹیوں کی پیدائش پر انہیں زندہ دفن کیا جاتا ہے، میں نے ستر گھروں کی بیٹیوں کو زندہ دفن کیا ہے، آپ کا رب مجھے کبھی معاف نہیں کرے گا۔
اسی وقت حضرت جبریل امین نے حاضرِ خدمت ہو کر عرض کیا کہ یا رسول اللہ ﷺ! اللہ سلام کہتا ہے اور فرماتا ہے کہ اسے کہیں اب تک جو ہو گیا، وہ ہو گیا، اس کے بعد ایسا گناہ کبھی نہ کرنا، ہم نے معاف کر دیا۔
حضرت دحیہ آپ کی زبان سے یہ بات سن کر رونے لگے، آپ ﷺ نے فرمایا: دحیہ اب کیا ہوا ہے؟ کیوں روتے ہو؟ حضرت دحیہ کلبی کہنے لگے، یا رسول اللہ! میرا ایک گناہ اور بھی ہے، جسے آپ کا رب کبھی معاف نہیں کرے گا، آپ ﷺ نے فرمایا: دحیہ کیسا گناہ؟ بتاؤ۔
حضرت دحیہ کلبی فرمانے لگے: یا رسول اللہ ! میری بیوی حاملہ تھی اور مجھے کسی کام کی غرض سے دوسرے ملک جانا تھا، میں نے جاتے ہوئے بیوی کو کہا کہ اگر بیٹا ہوا تو اس کی پرورش کرنا، اگر بیٹی ہوئی تو اسے زندہ دفن کر دینا۔
دحیہ روتے جا رہے ہیں اور واقعہ سناتے جا رہے ہیں، میں واپس بہت عرصہ بعد گھر آیا تو میں نے دروازے پر دستک دی، اتنے میں ایک چھوٹی سی بچی نے دروازہ کھولا اور پوچھا کون؟ میں نے کہا: تم کون ہو؟ تو وہ بچی بولی، میں اس گھر کے مالک کی بیٹی ہوں۔ آپ کون ہیں؟
دحیہ فرمانے لگے: یا رسول اللہ ﷺ میرے منہ سے نکل گیا، اگر تم بیٹی ہو اس گھر کے مالک کی تو میں مالک ہوں اس گھر کا۔
یا رسول اللہ! میرے منہ سے یہ بات نکلنے کی دیر تھی کہ چھوٹی سی اس بچی نے میری ٹانگوں سے مجھے پکڑ لیا اور بولنے لگی؛ بابا بابا بابا بابا آپ کہاں چلے گئے تھے؟ بابا میں کتنے دن سے آپ کا انتظار کر رہی ہوں؟
حضرت دحیہ کلبی روتے جا رہے ہیں اور فرماتے جارہے ہیں کہ اے اللہ کے نبی! میں نے بیٹی کو دھکا دیا اور جا کر بیوی سے پوچھا: یہ بچی کون ہے؟ بیوی رونے لگ گئی اور کہنے لگی: دحیہ! یہ تمہاری بیٹی ہے۔ یا رسول اللہ! مجھے ذرا ترس نہ آیا، میں نے سوچا میں قبیلے کا سردار ہوں، اگر اپنی بیٹی کو دفن نہ کیا تو لوگ کہیں گے، ہماری بیٹیوں کو دفن کرتا رہا اور اپنی بیٹی سے پیار کرتا ہے۔
یا رسول اللہ ! وہ بچی بہت خوبصورت، بہت حیسن تھی، میرا دل کر رہا تھا کہ اسے سینے سے لگا لوں، پھر سوچتا تھا کہ کہیں لوگ بعد میں یہ باتیں نہ کہیں کہ اپنی بیٹی کی باری آئی تو اسے زندہ دفن کیوں نہیں کیا؟ میں گھر سے بیٹی کو تیار کروا کر نکلا تو بیوی نے میرے پاؤں پکڑ لیے، دحیہ اسے نہ مارنا، دحیہ یہ تمہاری بیٹی ہے۔
ماں تو آخر ماں ہوتی ہے، میں نے بیوی کو پیچھے دھکا دیا اور بچی کو لے کر چل پڑا، رستے میں میری بیٹی نے کہا؛ بابا کیا مجھے نانی کے گھر لے کر جا رہے ہو؟ بابا کیا مجھے کھلونے لے کر دینے جا رہے ہو؟ بابا ہم کہاں جا رہے ہیں؟ یا رسول اللہ ! میں بچی کے سوالوں کا جواب ہی نہیں دیتا تھا، وہ پوچھتی جا رہی ہے، بابا کدھر چلے گئے تھے؟ کبھی میرا منہ چومتی ہے، کبھی بازو گردن کے گرد دے لیتی ہے، لیکن میں کچھ نہیں بولتا، ایک مقام پر جا کر میں نے اسے بٹھا دیا اور خود اس کی قبر کھودنے لگ گیا۔ آقا کریم ﷺ دحیہ کی زبان سے واقعہ سنتے جارہے ہیں اور روتے جا رہے ہیں، میری بیٹی نے جب دیکھا کہ میرا باپ دھوپ میں سخت کام کر رہا ہے تو اٹھ کر میرے پاس آئی، اپنے گلے میں جو چھوٹا سا دوپٹہ تھا، وہ اتار کر میرے چہرے سے ریت صاف کرتے ہوئے کہتی ہے: بابا دھوپ میں کیوں کام کر رہے ہیں؟ چھاؤں میں آ جائیں۔ بابا یہ کیوں کھود رہے ہیں؟ بابا گرمی ہے، چھاؤں میں آ جائیں اور ساتھ ساتھ میرا پسینہ اور مٹی صاف کرتی جا رہی ہے، لیکن مجھے ترس نہ آیا۔
آخر جب قبر کھود لی تو میری بیٹی پاس آئی، میں نے دھکا دے دیا، وہ قبر میں گر گئی اور میں ریت ڈالنے لگ گیا، بچی ریت میں سے روتی ہوئی اپنے چھوٹے چھوٹے ہاتھ میرے سامنے جوڑ کر کہنے لگی؛ بابا میں نہیں لیتی کھلونے، بابا میں نہیں جاتی نانی کے گھر، بابا میری شکل پسند نہیں آئی تو میں کبھی نہیں آتی آپ کے سامنے، بابا مجھے ایسے نہ ماریں۔
یا رسول اللہ ﷺ میں ریت ڈالتا گیا، مجھے اس کی باتیں سن کر بھی ترس نہیں آیا، میری بیٹی پر جب مٹی مکمل ہو گئی اور اس کا سر رہ گیا تو میری بیٹی نے میری طرف سے توجہ ختم کی اور بولی: اے میرے مالک میں نے سنا ہے، تیرا ایک نبی آئے گا، جو بیٹیوں کو عزت دے گا، جو بیٹیوں کی عزت بچائے گا، اے اللہ وہ نبی بھیج دے بیٹیاں مر رہی ہیں، پھر میں نے اسے ریت میں دفنا دیا۔
حضرت دحیہ کلبی رضی اللہ عنہ واقعہ سناتے ہوئے بے انتہا روئے، یہ واقعہ جب بتا دیا تو دیکھا آپ ﷺ اتنا رو رہے ہیں کہ آپ ﷺ کی داڑھی مبارک آنسوؤں سے گیلی ہو گئی، آپ ﷺ نے فرمایا: دحیہ ذرا پھر سے اپنی بیٹی کا واقعہ سناؤ، اس بیٹی کا واقعہ جو مجھ محمد کے انتظار میں دنیا سے چلی گئی، آپ ﷺ نے تین دفعہ یہ واقعہ سنا اور اتنا روئے کہ آپ کو دیکھ کر صحابہ کرام رضی اللہ عنہم رونے لگ گئے اور کہنے لگے: اے دحیہ! ہمارے آقا کو کیوں رلاتا ہے؟ ہم سے برداشت نہیں ہو رہا۔ آپ ﷺ نے حضرت دحیہ سے تین بار واقعہ سنا تو حضرت دحیہ کی رو رو کر کوئی حالت نہ رہی، اتنے میں حضرت جبرائیل علیہ اسلام حاضر ہوئے اور فرمایا: یا رسول اللہ ﷺ ! اللہ سلام کہتا ہے اور فرماتا ہے کہ اے محبوب ﷺ! دحیہ کو کہہ دیں وہ اُس وقت تھا، جب اس نے اللہ اور آپ ﷺ کو نہیں مانا تھا، اب مجھ کو اور آپ کو اس نے مان لیا ہے تو دحیہ کا یہ گناہ بھی ہم نے معاف کر دیا ہے، اس کے بعد آپ ﷺ نے فرمایا: جس نے دو بیٹیوں کی کفالت کی، انہیں بڑا کیا، ان کے فرائض ادا کیے، وہ قیامت کے دن میرے ساتھ اس طرح ہو گا، جس طرح شہادت کی اور ساتھ والی انگلی آپس میں ہیں۔

جواب: ہمیں کافی تلاش کے باوجود ایسا واقعہ نہیں مل سکا۔ اگر کسی کے حوالے سے ایسا واقعہ جاہلیت کے دور میں ثابت بھی ہو تو اسلام سے پہلے کا واقعہ ہونے کی بنا پر اس کے ذکر کی ضرورت نہیں ہے۔
بحوالہ دارالافتاء : جامعہ علوم اسلامیہ علامہ محمد یوسف بنوری تاؤن
فتوی نمبر : 144106201027