سوال: آج سے تقریباً تین سال پہلے میں نے اپنی بیوی کے بارے میں یہ الفاظ اپنی بیوی کے بارے میں اس کی غیرموجودگی میں کہے تھے کہ ’’یہ میری طرف سے فارغ ہے اور شام تک قانونی پرچہ دے دوں گا۔‘‘ یہ بات میں نے طلاق دینے کی نیت سے کہی تھی، لیکن یہ بات ڈائریکٹ بیوی سے نہیں کہی تھی، پھر بعد میں معاملہ رفع دفع ہوگیا تھا اور میں نے کوئی قانونی پرچہ بھی نہیں بنوایا تھا اور نہ ہی میرے گھر والوں نے اس مسئلہ سے متعلق کسی سے معلوم کیا تھا۔ اس لیے اس کے بعد ہم دونوں تین سال سے میاں بیوی کی حیثیت سے ساتھ رہ رہے ہیں، اب دوبارہ جب یہ سب باتیں ہوئیں تو اس میں میں نے یہ الفاظ کہے: (۱) میں تجھے طلاق دیتا ہوں۔ (۲) میری طرف سے فارغ ہے۔ چونکہ مجھے تین سال قبل والی بات یاد نہیں تھی، میرے گھر والوں نے مجھے دن تاریخ کے حساب سے یاد دلایا تو مجھے بات یاد آگئی۔ اب میرے گھر والے اس بات پر زور دے رہے ہیں کہ یہ سب طلاق واقع ہوچکی ہیں۔ اب مجھے یہ بتائیں کہ یہ کتنی طلاقیں واقع ہوئی ہیں، اور اب ہمارا آپس میں رجوع ہوسکتا ہے یا نہیں؟

جواب: واضح رہے کہ شوہر کا یہ کہنا (یہ میری طرف سے فارغ ہے) ہمارے عُرف میں الفاظِ کنایہ ہے، طلاق کی نیت سے کہنے سے ایک طلاقِ بائن واقع ہوگئی تھی، شوہر کو رجوع کرنے کا اختیار نہیں تھا، البتہ عدت یا عدت کے بعد طرفین کی رضامندی سے دوبارہ نکاح کرسکتے تھے، معاملہ کو رفع دفع کرکے بغیر نکاحِ جدید کے تین سال میاں بیوی کی حیثیت سے رہے ہیں، یہ حرام فعل کا ارتکاب کیا ہے، لہٰذا اس پر سچے دل سے توبہ و استغفار کریں، چونکہ تین سال سے آپس میں زوجیت کا رشتہ ختم تھا، اسی وجہ سے مزید دو طلاقیں ''(۱) میں تجھے طلاق دیتا ہوں (۲)میری طرف سے فارغ ہے'' واقع نہیں ہونگی، البتہ اب بھی طرفین کی رضامندی اور نئے مہر کے ساتھ بغیر حلالہ کے نکاح کرسکتے ہیں، لیکن یہ بات بھی یاد رہے کہ شوہر کو اب صرف دو طلاقوں کا حق حاصل ہوگا۔