سوال: مفتی صاحب! ایک قادیانی لڑکی مسلمان ہوئی ہے، لیکن اس کے والدین قادیانیت پر ہی مرے ہیں، تو کیا اس لڑکی کو اپنے قادیانی والدین کی میراث سے حصہ ملے گا؟

جواب: واضح رہے کہ قادیانی مرتد ہیں، اور مرتد اور مسلمان آپس میں ایک دوسرے کی میراث کے وارث نہیں بن سکتے، لہذا اگر قادیانی باپ کا انتقال ہوجائے اور اس کی بیٹی مسلمان ہو، تو اسے قادیانی باپ کی میراث میں سے کچھ نہیں ملے گا، بلکہ وہ میراث بیت المال میں جمع کرادی جائے گی، اور بیت المال نہ ہونے کی صورت میں اس مال کو فقراء پر صدقہ کیا جائے گا۔
سنن ابن ماجہ میں ہے:جناب رسول اللہﷺ نے فرمایا: "مسلمان کافر کا وارث نہیں ہوتا، اور نہ کافر مسلمان کا وارث ہوتا ہے"۔(سنن ابن ماجہ، حديث نمبر:2729)
فتاوی حقانیہ(336/5) میں ہے:قادیانی اور مسلمان ایک دوسرے کی میراث کے حقدار نہیں بن سکتے۔۔۔ قادیانی مرتد کی میراث بیت المال میں داخل کی جائےگی، اسی طرح کوئی قادیانی کسی مسلمان کی میراث میں حقدار نہیں بن سکتا، بلکہ مسلمان کی میراث اس کے مسلمان ورثاء میں قاعدہ شرعی کے مطابق تقسیم ہوگی۔