سوال: حضرت ! آپ سے ایک سوال پوچھنا تھا کہ میت کو غسل دینے کی اجرت لینا جائز ہے؟

جواب: احادیث میں مردہ کو بلا اجرت غسل دینے کی بڑی فضیلت آئی ہے، چنانچہ ایک حدیث میں آپ صلی اللہ علیہ وسلم نے فرمایا :
َ" عَنْ عَلِيٍّ قَالَ قَالَ رَسُولُ اللَّهِ صَلَّی اللَّهُ عَلَيْهِ وَسَلَّمَ : مَنْ غَسَّلَ مَيِّتًا وَکَفَّنَهُ، وَحَنَّطَهُ وَحَمَلَهُ، وَصَلَّی عَلَيْهِ ، وَلَمْ يُفْشِ عَلَيْهِ مَا رَأَی خَرَجَ مِنْ خَطِيئَتِهِ مِثْلَ يَوْمِ وَلَدَتْهُ أُمُّهُ".
ترجمہ:
حضرت علی کرم اللہ وجہہ سے روایت ہے کہ رسول اللہ ﷺ نے فرمایا: جو کسی میّت کو نہلائے کفن پہنائے، خوشبو لگائے اور اس کو اٹھائے، نماز جنازہ پڑھے اور کوئی عیب وغیرہ دیکھا، تو اس کو ظاہر نہ کرے، وہ اپنی خطاؤں سے ایسے پاک صاف ہو جاتا ہے جیسے وہ اپنی پیدائش کے دن خطاؤں سے پاک صاف تھا ۔
مردہ کو غسل دینا مسلمانوں پر فرض کفایہ ہے، کوئی بھی نہیں دے گا تو سب گناہ گار ہوں گے، لیکن اگر ایک ہی غسل دینے والا مسلمان اس میت کے پاس ہو، کوئی دوسرا نہیں ہو تو اس اکیلے متعین مسلمان شخص پر فرض عین ہے کہ وہ میت کو غسل دے، اس صورت میں اس کے لئے اجرت لینا جائز نہیں ہے، کیونکہ فرض عبادت پر اجرت لینا جائز نہیں ہے، البتہ جہاں کئی مسلمان ہوں، وہاں کوئی غسل میت کی اجرت لے تو لینے کی گنجائش ہے ۔