سوال: تہبند پہننا سنت سے ثابت ہے یا نہیں؟

جواب: جی ہاں ! آپ صلی اللہ علیہ وسلم کا عام معمول تہبند پہننے کا تھا۔
واضح رہے کہ لغت میں سنت بمعنیٰ طریقہ کے آتا ہے، عام ہے کہ وہ طریقہ اچھا ہو یا برا۔
مراقی الفلاح میں ہے:
والسنۃ لغۃ: الطریقۃ ولوسیئۃ
(ص، ۳۸۔ ۳۵، دارالایمان بیروت)
اوراصطلاح شرع میں سنت کی تعریف یہ ہے کہ جس کو حضور اقدس صلى الله عليه وسلم نے کیا ہو یا آپ کے صحابہ نے کیا ہو۔
والسنۃ عند الحنفیۃ مافعلہ أو واحد من أصحابہ اھ۔ (طحطاوي علی المراقي)
عام طور پر فقہائے کرام نے سنن کی دو قسمیں بیان فرمائی ہیں : (۱) سننِ ہدیٰ/تعبُّدیہ۔ (۲) سننِ عادیہ/زائدہ۔
(۱) سننِ ہدیٰ/تعبُّدیہ: جسے آپ صلی اللہ علیہ وسلم یا آپ کے بعد خلفائے راشدین نے عبادت کے طور پر کیا ہو، یہ مکملات دین میں سے ہوتی ہیں، یہ سننِ مؤکدہ قریب بواجب ہوتی ہیں ، جیسے: نماز با جماعت، اذان، اقامت، سننِ رواتب وغیرہ، شریعت میں اِن کو کرنے کی تاکید آئی ہے، ان کا حکم یہ ہے کہ ان کا چھوڑنا گمراہی اور قابلِ ملامت ہے۔
(سنن کی ایک قسم غیر مؤکدہ ہے، جس پر مواظبت وہمیشگی ثابت نہ ہو، اس کا تارک عاصی نہیں ہے، ہاں ! عامل ماجور ہے، جیسا کہ عصر کی سنتِ قبلیہ)
(۲) سننِ عادیہ/زائدہ: جسے آپ صلی اللہ علیہ وسلم نے بطورِ عبادت نہ کیا ہو، بلکہ اپنی عادتِ مبارکہ کے طور پر آپ کے جسمِ اطہر سے صادر ہوئی ہوں، جیسے اُونٹ پرسواری کرنا، تہبند باندھنا، منقش یمنی شال استعمال فرمانا، مخصوص وضع کا لباس زیب تن فرمانا، عمامہ باندھنا، نشست وبرخواست کا مخصوص انداز وغیرہ وغیرہ، یہ سب چیزیں سننِ عادیہ میں سے ہیں، جسے شرعی اصطلاح میں سننِ زوائد بھی کہا جاتا ہے، یہ مستحب کے درجے میں ہیں، ان کے کرنے میں ثواب ہے اور نہ کرنے میں کوئی ملامت اور عتاب نہیں ہے۔ ہاں ! ان کا بجالانا اَولیٰ اور افضل ہے، اور آپ صلی اللہ علیہ وسلم سے محبت کی علامت ہے۔
یا یوں کہا جائے کہ جن سنتوں کا تعلق عبادات جیسے: نماز، روزہ، اذان، اقامت سے ہوں، وہ سننِ ہدیٰ ہیں۔ اور جن کا تعلق مباحات جیسے: چلنے، پھرنے، کھانے پینے اور پہننے سے ہے، وہ سننِ عادیہ ہیں۔
فائدہ : عادات میں مزاج وغیرہ کے لحاظ کرنے کا اختیار ہے، حضور صلی اللہ علیہ وسلم کی بعض عادات ایسی ہیں، جن کو ہم برداشت نہیں کرسکتے، اس لیے شریعت نے عادتِ نبویہ کا اتباع واجب نہیں کیا۔ ہاں ! اگر کسی کو ہمت ہو اور عادت پر عمل کرنا نصیب ہوجائے تو اس کی فضیلت میں شک نہیں، مگر اس کو دوسروں پر طعن کرنے کا بھی حق نہیں۔
تنبیہ : زوائد کے لفظ سے یہ غلط فہمی نہ ہو کہ ان اُمور کا بجالانا عبادت میں شامل نہیں، ایسا ہرگز نہیں ! یہ بھی عبادت میں داخل ہیں، کیوں کہ فی نفسہٖ سنت کا مفہوم ہی عبادت ہے(ہاں ! البتہ حضور اکرم صلی اللہ علیہ وسلم نے بطورِ عبادت انجام نہیں دیا)۔