سوال: نبی کریم ﷺ کی ولادت اور وفات کے دن اور تاریخ کے بارے میں صحیح اور محقق قول کیا ہے؟

جواب: مؤرخین اور اصحاب ِسیر کا اس بات پر اتفاق ہے کہ رسولِ اکرمﷺ کی ولادت باسعادت پیر کے دن ہوئی ہے، جیسا کہ صحیح مسلم کی درج ذیل روایت سے بھی یہ بات ثابت ہوتی ہے کہ جب اللہ کے رسولﷺ سے پیر کے روزہ کے بارے میں دریافت کیا گیا تو آپﷺ نے ارشاد فرمایا: "یہی وہ دن ہے جس میں میں پیدا ہوا اور جس میں مجھے منصب ِرسالت سے سرفراز کیا گیا"۔(صحیح مسلم، حدیث نمبر:1162)
البتہ ولادت کے سال، تاریخ اور مہینے کے بارے میں اقوال مختلف ہیں، چنانچہ حافظ ابن کثیرؒ فرماتےہیں:اس بات پر اتفاق ہے کہ رسولِ اکرمﷺ عام الفیل (یعنی جس سال ابرہہ نے ہاتھیوں کے لشکر سے بیت اللہ شریف پر حملہ کیا) میں پیدا ہوئے،اسی طرح جمہور اہل علم کا مسلک یہ ہے کہ آپﷺ ماہ ربیع الاول میں پیدا ہوئے، اور علامہ ابن جوزی نے اس پر اتفاق نقل کیا ہے، لیکن یہ کہ آپﷺ اس ماہ کے اول، آخر یا درمیان یا کس تاریخ کو پیدا ہوئے؟ اس میں مؤرخین اور سیرت نگاروں کے متعدد اقوال ہیں، کسی نے ربیع الاول کی دو تاریخ کہا، کسی نے آٹھ، کسی نے دس، کسی نے بارہ، کسی نے سترہ، کسی نے اٹھارہ اور کسی نے بائیس ربیع الاول کہا ہے اور بہت سے محققین نے بارہ کی بجائے نو یا آٹھ ربیع الاول کو یومِ ولادت ثابت کیا ہے،جن میں سے چند محقق سیرت نگاروں کے اقوال مندرجہ ذیل ہیں:
۱) قاضی سلیمان منصور پوری"رحمة للعالمین" میں لکھتے ہیں: تاریخِ ولادت باسعادت میں موٴرخین نے بہت اختلاف کیا ہے، طبری اور ابن خلدون نے ۱۲ ربیع الاوّل لکھی ہے اور ابوالفداء نے۱۰ربیع الاوّل لکھی ہے، بعض نے ۸ربیع الاوّل اور مشہور یہی روایت ہے، مگر سب کا اس پر اتفاق ہے کہ ولادتِ شریفہ دوشنبے کے دن ہوئی، چونکہ دو شنبہ کا دن ۹ربیع الاوّل کے سوا کسی اور تاریخ سے مطابقت نہیں رکھتا، اس لیے ۹ربیع الاول ہی صحیح ہے۔
٢) تاریخ دول العرب والاسلام میں "طلعت بک عرب" نے بھی ۹ تاریخ ہی کو صحیح قرار دیا ہے۔ چنانچہ فلکیات کے مشہور مصری عالم اور محقق محمود پاشا کی تحقیق بھی یہی ہے کہ آپﷺ کی ولادتِ شریفہ دوشنبہ کے دن، ۹ربیع الاوّل کو واقعہٴ فیل کے پہلے سال ہوئی۔ (رحمة للعالمین، قاضی سلیمان منصورپوری:69/1، ط: مرکزالحرمین الاسلامی)
٣) "الرحیق المختوم" کے مصنف مولانا صفی الرحمن مبارکپوری کے بقول ''رسول اللہﷺ مکہ میں شعب بنی ہاشم کے اندر ۹ ربیع الاول عام الفیل یوم دو شنبہ (سوموار) کو صبح کے وقت پیدا ہوئے۔ (ص:83،ط: المکتبة السلفیة لاہور)
٤) برصغیر کے معروف مؤرخین مثلاً علامہ شبلی نعمانی، اکبر شاہ نجیب آبادی وغیرہ نے بھی ۹ ربیع الاول کے یوم ولادت ہونے کو از روئے تحقیق جدید صحیح ترین تاریخ ولادت قرار دیا ہے۔(سیرت النبی،شبلی نعمانی :137/1،ط:مکتبہ اسلامیہ لاہور /تاریخ اسلام ، اکبر شاہ :87/1)
٥) "سیرت مصطفے ﷺ " میں مولانا ادریس کاندھلویؒ صاحب نے لکھا ہے کہ جمہور محدثین اور مورخین کے نزدیک راجح اور مختار قول یہ ہے کہ حضورﷺ 8 ربیع الاول کو پیدا ہوئے۔ عبداللہ بن عباس اور جبیر بن مطعم سے بھی یہی منقول ہے اور اسی قول کو علامہ قطب الدین نے اختیار کیا ہے۔ (57/1، ط: دارالناشر)
٦) "ہادیٔ اعظم " میں حضرت حافظ سید فضل الرحمن صاحب لکھتے ہیں: خلاصہ یہ کہ راجح تر ین قول یہی ہے کہ آں حضرت ﷺکی ولادت با سعادت عام الفیل میں واقعہ فیل کے پچاس روز بعد ۸ رمضان المبار ک ا، میلادی قمری) ۸ ربیع الاول ۱ ،میلادی قمریہ شمسی / ۴ نومبر (۵۷۹) کور بیع الاول کو پیر کے روز صبح صادق کے وقت محلہ سوق اللیل، مکہ مکرمہ میں ہوئی۔ (ہادیٔ اعظم:208/1،زوارا كيڈمي)
تاریخ ِولادت میں راجح قول :
بہرحال حضورِ اکرم ﷺ کی ولادت باسعادت کے حوالے سے مؤرخین اور سیرت نگاروں کی آراء مختلف ہیں، مشہور یہ ہے کہ بارہ ربیع الاول کو پیدائش ہوئی، لیکن راجح قول کے مطابق حضور اکرمﷺ کی پیدائش 8 ربیع الاول بمطابق 20 یا 22 اپریل 571 عیسوی کو ہوئی۔
جناب رسول اللہ ﷺکی تاریخ ِ وفات:
اس بارے میں تقریباً جمہور متفق ہیں کہ آپ ﷺ کی وفات ربیع الاول میں پیر کے روزہوئی مگر وفات کے وقت اور تاریخ کے بارے میں شدید اختلاف پایا جاتا ہے اس بارے میں تین اقوال ہیں:
۱)ابن اسحاق،واقدی،اور ابن سعد ، علامہ ابن جریر طبریؒ اور اکثر مؤرخین اور سیرت نگاروں نے لکھا ہے کہ ۱۲ ربیع الاول رسولِ اکرمﷺ کا یوم وفات ہے۔
۲) موسی بن عقبہ اور خوازمی کے نزدیک یکم ربیع الاول کو وفات ہوئی۔
۳) امام کلبی،زہری ،خلیفہ بن خیاط ،فضل بن دکین کے نزدیک دو ربیع الاول کو وفات ہوئی ۔علامہ سہیلی،علامہ ابن حجر عسقلانی نے اسی کو راجح قرار دیا۔
حضرت مفتی محمد شفیع عثمانی ؒ نے "سیرت خاتم الانبیاء " کے حاشیہ میں لکھاہے: تاریخ وفات میں مشہور یہ ہے کہ ۱۲/ربیع الاول کو واقع ہوئی اور یہی جمہور مورخین لکھتے چلے آئے ہیں؛لیکن حساب سے کسی طرح بھی یہ تاریخ وفات نہیں ہوسکتی ہے؛ کیوں کہ یہ بھی متفق علیہ اور یقینی امر ہے کہ وفات دوشنبہ کو ہوئی اور یہ بھی یقینی ہے کہ آپ کا حج۹/ ذی الحجہ روزجمعہ کو ہوا،ان دونوں باتوں کے ملانے سے ۱۲/ربیع الاول بروز دوشنبہ میں نہیں پڑتی؛ اسی لیے حافظ ابن حجرنے شرح صحیح بخاری میں طویل بحث کے بعد اس کو صحیح قرار دیاہے کہ تاریخ وفات دوسری ربیع الاوّل ہے، کتابت کی غلطی سے( ۲ کا ۱۲) اور عربی عبارت میں ”ثاني شهر ربيع الأول" کا "ثاني عشر ربيع الأول" بن گیا۔ حافظ مغلطائ نے بھی دوسری تاریخ کو ترجیح دی ہے۔ (سیرت خاتم الانبیاء:110،ط:مكتبة البشرى)
تاریخ ِ وفات میں راجح قول:
راجح قول کےمطابق جناب رسول اللہ ﷺ کی وفات دو ربیع الاول کو ہوئی۔
حضوراکرم ﷺ کی تاریخ ولادت میں اختلاف کیوں؟
حضوراکرم ﷺ کی تاریخ ولادت میں اختلاف کی وجوہات مندرجہ ذیل ہیں: (۱) تاریخی روایات میں تعارض پایا جاتا ہے۔ (۲) قمری اور شمسی سال میں اختلاف کی وجہ سے۔(۳) مشرکین عرب تاریخ میں ردو بدل کرکے مہینوں کو آگے پیچھے کردیا کرتے تھے، جس کو قرآن کریم نے یوں رد کیا ہے۔
ترجمہ: "اور یہ نسیئ (یعنی مہینوں کو آگے پیچھے کردینا) تو کفر میں ایک مزید اضافہ ہے جس کے ذریعے کافروں کو گمراہ کیا جاتا ہے"۔(سورہ توبہ، آیت نمبر: 37)