سوال: السلام علیکم! اگر ایک لڑکا اور لڑکی نکاح کرنا چاھتے ہیں، لیکن لڑکی کے گھر والے نہیں مان رہے، اس تاخیر کی وجہ سے دونوں کے درمیان بار بار زنا کا گناہ ہو رہا ہے، لیکن گھر والے لڑکی کی شادی کہیں اور کروانا چاہتے ہیں، اس صورت میں کیا یہ اجازت ہے کہ لڑکا اور لڑکی خود کو گناہ سے بچانے کے لیے کورٹ میرج کرلیں؟

جواب: واضح رہے کہ اجنبی مرد و عورت کا آپس میں بلا ضرورت باتیں کرنا، ملنا جلنا اور میاں بیوی والے تعلقات قائم کرنا بہر صورت ناجائز اور حرام ہے، لہذا اس گناہ پر صدق دل سے توبہ و استغفار اور ناجائز تعلقات فوری طور پر ختم کرنا شرعا لازم اور ضروری ہے۔
شریعتِ مطہرہ نے لڑکی اور لڑکے دونوں کی حیاء، پاکدامنی، اخلاق اور معاشرت کا خیال رکھتے ہوئے اپنے ولی کی سرپرستی میں نکاح کی ترغیب دی ہے، یہی شرعاً اور اخلاقاً پسندیدہ طریقہ ہے، اسی میں دینی، دنیوی اور معاشرتی فوائد ہیں، لہذا ولی کی رضامندی کے بغیر کورٹ میرج یا خفیہ طور پر نکاح کرنا اخلاقا و عُرفاً شرم و حیا کے خلاف ہے، اس لیے اس سے اجتناب کرنا چاہیے، نیز والدین کو بھی اپنے بچوں کی مرضی اور ان کے مزاج کی رعایت رکھنی چاہئیے، اگر کوئی شرعی عذر نہ ہو، تو ان کی مرضی کی جگہ پر نکاح کرنے کی اجازت دے دینی چاہئیے۔
تاہم اگر عاقل بالغ لڑکا اور لڑکی والدین کو لاعلم رکھ کر شرعی گواہوں کی موجودگی میں کورٹ وغیرہ کے ذریعے باہمی رضامندی سے نکاح کرلیں، تو شرعی طور پر نکاح منعقد ہو جاتا ہے۔
تاہم اگر لڑکی نے غیر کفو میں نکاح کیا ہو (یعنی وہ لڑکا اس کے خاندان ،نسب ، مال اور دین کے اعتبار سے اس کے ہم پلہ نہ ہو) تو اس کے والدین (اولیاء) کو نکاح فسخ کرانے کا اختیار حاصل ہوگا، بشرطیکہ اولاد ہونے سے پہلے ولی اس حق کو استعمال کرلے، وگرنہ اولاد ہوجانے کے بعد یہ حق ختم ہوجائے گا۔