سوال: مفتی صاحب !حرمت مصاہرت کیا ہے اور کب ثابت ہوتی ہے؟
چھوٹی بچیوں کو باپ اکثر گود میں لیتے ہیں یا ساتھ سُلا لیتے ہیں اور وساوس سے تو کوئی خالی نہیں تو کیا حکم ہے؟

جواب: انسانوں کے درمیان تعلقات اور محرم رشتے دو طرح کے ہوتے ہیں، ایک نسب اور خون کے رشتے، اور دوسرے سسرالی رشتے، اس سسرالی رشتے کو ”مصاہرت“ کہتے ہیں، جیسے: سسر، ساس اور ان کے اصول یعنی ان کے پدری (باپ) اور مادری (ماں) سلسلہ اوپر تک، اور بیوی کی بیٹی، شوہر کا بیٹا وغیرہ، ان رشتہ داروں سے حرمت کو”حرمتِ مصاہرت“ کہا جاتا ہے۔
واضح رہے کہ اگر کوئی شخص کسی عورت سے نکاح کرلے ، یا اس سے جماع (ہمبستری) یا زنا کرے، یا اس عورت کو شہوت کے ساتھ کسی حائل کے بغیر چھولے یا شہوت کے ساتھ اس کی شرم گاہ کے اندرونی حصہ کی طرف دیکھ لے، تو چند شرائط کے ساتھ حرمتِ مصاہرت ثابت ہوجاتی ہے، یعنی اس عورت کے اصول( آباء و اجداد اور ان سے اوپر (باپ، دادا، پردادا وغیرہ) و فروع((بیٹا، بیٹی، پوتا، پوتی، نواسہ، نواسی اور ان سے نیچے جتنے بھی ہیں) مرد پر حرام ہوجائیں گے اور اس مرد کے اصول (آباؤ و اجداد وغیرہ) و فروع (بیٹے پوتے وغیرہ) عورت پر حرام ہوجائیں گے۔
واضح رہے کہ جس طرح ہمبستری کرنے سے حرمت مصاہرت ثابت ہوجاتی ہے، اسی طرح شہوت سے ہاتھ لگانے سے بھی ثابت ہوجاتی ہے، لیکن شرمگاہ کے علاوہ باقی جسم کو صرف شہوت کے ساتھ دیکھنے سے حرمت مصاہرت ثابت نہیں ہوتی، بلکہ شھوت کے ساتھ چھونے سے ہوتی ہے، البتہ شہوت کے ساتھ چھونے سے حرمت مصاہرت ثابت ہونے کے لیے بھی چند شرائط ہیں، اگر وہ پوری ہوں گی، تو حرمت ثابت ہو گی اور اگر ان میں سے ایک بھی کم ہو گی، تو حرمت مصاہرت ثابت نہیں ہوگی۔