سوال: مفتی صاحب! بعض لوگ یہ خیال کرتے ہیں کہ رمضان کا آخری جمعہ ‘‘جمعۃ الوداع‘‘ ہے اور اس میں روزے کا ثواب دوسرے دنوں کے روزوں کے مقابلے میں زیادہ ہے اور اس دن کا روزہ رکھنے سے پچھلے روزے معاف ہوجاتے ہیں، براہ کرم اس کے بارے میں وضاحت فرمادیں۔

جواب: واضح رہے کہ یہ خیال بالکل باطل اور غلط ہے، شریعت میں اس کی کوئی اصل نہیں ہے، شیطان نے اس قسم کے خیالات لوگوں کے دِلوں میں اس لئے پیدا کئے ہیں، تاکہ وہ فرائض بجالانے میں کوتاہی کریں۔
جمعۃ الوداع کی شرعی حیثیت:
جمعہ کے دن کی خصوصی فضیلتیں احادیث سے ثابت ہیں، رمضان المبارک چونکہ خود بھی برکت اور دعاء کی قبولیت کا مہینہ ہے، اس لئے اس ماہ کے جمعہ میں برکت اور قبولیت کی توقع زیادہ ہے، لیکن اس اعتبار سے رمضان کے تمام جمعے برابر ہیں، آخری جمعہ کی خصوصیت نہیں ہے۔
عوام میں رمضان المبارک کا آخری جمعہ بڑی اہمیت کے ساتھ مشہور ہے، اور اس کو "جمعة الوداع" کا نام دیا جاتا ہے، لیکن احادیثِ شریفہ میں آخری جمعہ کی کوئی الگ سے خصوصی فضیلت ذکر نہیں کی گئی ہے۔