سوال: کیا خواتین کے لیے نفاس میں چالیس دن گزارنا ضروری ہیں یا جب نفاس کا خون رک جائے تو وہ پاک سمجھی جائے گی؟

جواب: یہ غلط فہمی آج کل عوام الناس میں بہت مشہور ہے کہ بچہ کی پیدائش کے بعد عورت ہر حالت میں چالیس دن تک ناپاک رہتی ہے، جسے عرف عام میں "چھلہ" کہا جاتا ہے، حالانکہ شرعی اعتبار سے یہ بات بالکل غلط ہے، شرعا نفاس کی زیادہ سے زیادہ مدت چالیس دن ہے اور اس کی کم از کم مدت کے لیے کوئی حد مقرر نہیں ہے، لہٰذا اگر بچہ کی پیدائش کے بعد چالیس دن سے پہلے نفاس کا خون رک جائے، چاہے بچہ پیدا ہونے کے پانچ دن کے بعد ہی رک جائے تو وہ عورت پاک سمجھی جائے گی، پاک ہونے کے لیے پورے چالیس دن کا گزرنا ضروری نہیں ہے۔