سوال: السلام علیکم، مفتی صاحب! میں نےدو لاکھ روپے ایک دوست کو قرض کے طور پر دیئے تھے، مگر اب وہ مجھے واپس نہیں کر رہا اور آئندہ بھی اس کے واپس دینے کی کوئی امید نہیں ہے، تو کیا اس پیسوں کی زکوۃ مجھ پر لازم ہوگی یا نہیں؟

جواب: واضح رہے کہ جس قرضے کی وصولیابی کی امید بالکل ختم ہو گئی ہو (جس کو عرف عام میں Dead amount کہا جاتا ہے)، اس رقم پر زکوٰۃ واجب نہیں ہے۔ البتہ کبھی آئندہ وہ رقم وصول ہو جائے، تو صرف اس سال کی زکوٰة دینی ہو گی جس سال وہ رقم ملی ہے۔
ہاں ! اگر وصول یابی میں بالکل مایوسی نہ ہوئی ہو، بلکہ دونوں احتمالات ہوں کہ ملے یا نہ ملے، تو اس کی زکوٰة رقم کے وصول ہونے تک مؤخر کر سکتے ہیں اور اس صورت میں رقم وصول ہونے پر پچھلے سالوں کی زکوٰة بھی ادا کرنی ہوگی۔