سوال: السلام علیکم، مفتی صاحب ! جن مسلمان ملکوں میں موجودہ حالات کی وجہ سے باجماعت نماز کی ادائیگی ممنوع ہے، وہاں نماز عید کیسے ادا کی جائے گی؟

جواب: واضح رہے کہ عید کی نماز میں اصل مطلوب مسلمانوں کا اجتماع کثیر اور عید گاہ یا جامع مسجد میں نماز عید ادا کرنا ہے، کیونکہ نیک لوگوں کا جس قدر مجمع ہوگا، اتنا ہی دعا کی قبولیت میں مؤثر ہوگا، رسول اللہ صلی اللہ علیہ وسلم نے بھی عید کے اجتماع کی اس خصوصیت کی طرف اشارہ فرمایا کہ مسلمانوں کی دعا کا موقع ہوتا ہے، نیز عید کی نماز کے اس مجمع پر اللہ تعالی بھی فرشتوں کے سامنے فخر فرماتے ہیں، لیکن اگر موجودہ حالات کے پیش نظر حکومت کی طرف سے عید الفطر تک لاک ڈاؤن کی یہی صورتِ حال رہی اور عید کی نماز مساجد یا عیدگاہ میں ادا کرنے پر پابندی عائد کردی گئی، تو اس مجبوری کی حالت میں لوگوں کو چاہیے کہ وہ مساجد کے علاوہ میدان، پلاٹ، کھلی جگہوں یا گھروں میں، جہاں کہیں چار یا چار سے زیادہ بالغ مرد جمع ہوکر پڑھ سکیں ( گھر میں پڑھنے کی صورت میں گھر کے دروازے کو کھلا رکھا جائے، اور کسی کو نماز میں شریک ہونے سے منع نہ کیا جائے، تاکہ اذن عام کا تحقق ہو سکے)، تو ان کو چاہیے کہ وہ وہیں عید کی نماز قائم کرنے کی کوشش کریں۔
عید کی نماز کے لیے چوں کہ مسجد کا ہونا شرط نہیں ہے، لہٰذا کسی بھی جگہ پر امام کے علاوہ کم از کم تین مرد مقتدی ہوں، تو بھی عید کی نماز صحیح ہوجائے گی، چناں چہ عید کی نماز کا وقت (یعنی اشراق کا وقت) داخل ہوجانے کے بعد امام دو رکعت نماز پڑھا دے اور خطبہ مسنونہ دے، امام کو اگر عربی خطبہ یاد نہ ہو، تو کوئی بھی عربی خطبہ دیکھ کر پڑھ لے، ورنہ عربی زبان میں حمد و صلاۃ اور قرآنِ پاک کی چند آیات پڑھ کر دونوں خطبے دے دے۔ (امام کے بیٹھنے کے لیے اگر منبر موجود ہو تو بہتر، ورنہ کرسی پر بیٹھ جائے اور زمین پر کھڑے ہوکر خطبہ دے دے)
اگر شہر یا فنائے شہر یا قصبہ میں چار بالغ افراد جمع نہ ہوسکیں، تو وہاں عید کی نماز ادا نہ کریں۔
جن لوگوں کے لئے نماز عید کی کوئی صورت نہ بن سکے، عذر اور مجبوری کی وجہ سے ان سے عید کی نماز معاف ہوگی، لہذا ان کو پریشان ہونے کی ضرورت نہیں، البتہ اگر یہ حضرات اپنے اپنے گھروں میں انفرادی طور پر دو یا چار رکعات چاشت کی نماز پڑھ لیں تو بہتر ہے، کیوں کہ جنہیں عید کی نماز نہ مل سکے، ان کے لئے فقہاء نے دو یا چار رکعت چاشت کی نماز کو مستحب قرار دیا ہے۔