سوال: مفتی صاحب ! اگر رات کو بیدار ہو جائیں تو کون سی دعا پڑھیں؟

جواب: جو شخص رات کو بیدار ہوجائے تو یہ دعا پڑھے:
(1) لَا اِلٰہَ اِلَّا اللہُ وَحْدَہٗ لَا شَرِیْکَ لَہٗ، لَہُ الْمُلْکُ وَلَہُ الْحَمْدُ، وَھُوَ عَلیٰ کُلِّ شَيْ ءٍ قَدِیْرٌ۔ اَلْحَمْدُ لِلّٰہِ وَ سُبْحَانَ اللہِ وَ لَا اِلٰہَ اِلَّا اللہُ وَاللہُ اَکْبَرُ وَلَا حَوْلَ وَلَا قُوَّۃَ اَلَّا بِاللہِ .
ترجمہ: اللہ کے سوا کوئی معبود نہیں، اس کا کوئی شریک نہیں، اسی کی بادشاہت ہے، اور اسی کی حمد و ثنا ہے، اور وہ ہر چیز پر قادر ہے۔ اللہ پاک ہے، اور حمد و ثنا اللہ ہی کے لئے ہے، اللہ کے سوا کوئی معبود نہیں اور اللہ سب سے بڑا ہے ۔ گناہوں سے پھیرنے اور عبادت کرنے کی طاقت اللہ ہی کی طرف سے ہے۔
(صحیح بخاری، باب فضل من تعار من اللیل فصلی، رقم الحدیث: 1154 )
فضیلت: حدیث شریف میں آتا ہے کہ جو شخص رات کو بیدار ہو کر مذکورہ دعا پڑھے، اس کے بعد اللھم اغفرلی پڑھے یا کوئی بھی دعا کرے تو اس کی دعا قبول کی جاتی ہے۔ پھر اگر وہ وضو کر کے (نماز پڑھے) تو نماز بھی قبول کی جاتی ہے۔
رات کو بیدار ہونے کے بعد یہ دعا پڑھنا بھی منقول ہے:
(2) لَا إِلَهَ إِلَّا أَنْتَ، سُبْحَانَكَ، اَللّٰهُمَّ أَسْتَغْفِرُكَ لِذَنْبِي، وَأَسْأَلُكَ رَحْمَتَكَ، اَللّٰهُمَّ زِدْنِي عِلْمًا، وَلَا تُزِغْ قَلْبِي بَعْدَ إِذْ هَدَيْتَنِي، وَهَبْ لِي مِنْ لَدُنْكَ رَحْمَةً، إِنَّكَ أَنْتَ الْوَهَّابُ۔
اے اللہ ! تیرے سوا کوئی معبود نہیں، تیرا کوئی شریک نہیں، تیری ہی ذات پاک ہے، اے اللہ ! میں تجھ سے اپنے گناہوں کی مغفرت چاہتا ہوں، اور تیری رحمت طلب کرتا ہوں، اے اللہ ! میرے علم میں اضافہ فرما، اور مجھے راہ راست پر لانے کے بعد میرے دل کو کجی والا نہ بنا، اور مجھے اپنے پاس سے رحمت عطا فرما، کچھ شک نہیں کہ تو بڑا دینے والا ہے۔
(السنن لأبي داؤد، بَابُ مَا يَقُولُ الرَّجُلُ إِذَا تَعَارَّ مِنَ اللَّيْلِ، رقم الحديث: 5061)