سوال: السلام علیکم، مفتی صاحب!
اگر کوئی شخص ایک مرتبہ صاحبِ نصاب ہو گیا اور سال پورا ہونے تک صاحبِ نصاب رہا، لیکن دورانِ سال مال آ تا جاتا رہا یا نفع و نقصان ہوتا رہا تو مالِ زکوٰۃ کیسے طے کیا جائے؟ اگر کوئی مخصوص رقم سال کے آخری حصے میں آئی، جب کہ اس پر سال پورا نہ ہوا تو کیا اس پر بھی زکوٰۃ دینی لازم ہوگی؟

جواب: واضح رہے کہ زکوٰۃ کی ادائیگی واجب ہونے کے لیے نصاب زکوٰۃ پر سال گزرنا لازمی ہے، البتہ سال گزرنے کا یہ مطلب نہیں ہے کہ مال کے ہر ہر حصے پر مکمل سال گزرے، کیونکہ مال سارا سال آتا جاتا رہتا ہے، لہذا سال گزرنے کا اصول یہ ہے کہ جب کوئی شخص نصاب زکوٰۃ کا مالک ہوا ہے، اس دن ( سال کے پہلے دن) اور سال مکمل ہونے کے آخری دن، وہ شخص صاحب نصاب ہو، دوران سال اگر مال بڑھ جائے یا کم ہوجائے ( یعنی نصاب سے کم ہو گیا ہو، بالکل ختم نہ ہوا ہو ) اس سے کوئی فرق نہیں پڑتا اور اس اضافے پر الگ سے سال کا گزرنا ضروری نہیں ہے، خواہ یہ اضافہ سال مکمل ہونے سے دو دن پہلے ہوا ہو۔
ہاں! اگر مال بالکل ہی ختم ہو جائے، کہ ایک روپیہ بھی نہ بچے، تو ایسی صورت میں سال کا حساب ختم ہوجائے گا، پھر جب مال آجائے اور اتنا آجائے کہ وہ نصاب زکوٰۃ کو پہنچتا ہو، تو اس پر از سرِنو سال گزرے گا، پھر زکوٰۃ ادا کی جائے گی۔