سوال: مفتی صاحب! مجھے منت ماننے کا درست طریقہ بتادیں۔

جواب: واضح رہے کہ نذر (منت) درج ذیل شرائط کے ساتھ معتبر ہوتی ہے:
1) نذر (منت) اللہ تعالى کے نام کى مانى جائے، لہذا غیر اللہ کے نام مثلا: کسى نبى یا ولى کى نذر شرعاً معتبر نہیں ہے۔
2) جس کام کى نذر (منت) مانى جائے، وہ کام عبادت کا کام ہو، کوئی گناہ کا کام نہ ہو۔
3) نذر (منت) کے ذریعے اپنے اوپر ایسى چیز لازم کى جائے جس کی اصل شریعت میں عبادت مقصودہ کی شکل میں پہلے سے موجود ہو، یعنى ایسے کام کى نذر مانى جائے جو کہ شریعت میں فرض یا واجب کا درجہ رکھتا ہو، مثلا: نماز، روزہ، حج اور قربانى وغیرہ، یعنی ان عبادات میں سے کسى کام کو اپنے اوپر بطورِ نذر لازم کیا جائے، مثلا: دو رکعت نذر مانی یا روزہ رکھنے کی نذر مانی یا قربانی کرنے کی نذر مانی تو یہ سب منتیں معتبر ہیں، کیونکہ نماز، روزہ اور قربانی شرعاً عبادات مقصودہ ہیں۔
4) جس کام کی نذر مانی جائے وہ کام فی الحال اس شخص پر فرض یا واجب نہ ہو، مثلاً: کوئی شخص کہے کہ اگر میرا فلاں کام ہو گیا تو میں فجر کی نماز ادا کروں گا تو یہ نذر معتبر نہیں ہے، کیونکہ فجر کی نماز پہلے سے ہی فرض ہے۔
5) نذر (منت) کے الفاظ زبان سے ادا کیے جائیں، صرف دل ہی دل میں ارادہ کرنے سے نذر منعقد نہیں ہوتی ہے۔
6) نذر (منت) کے الفاظ پختہ ارادے والے ہوں، یعنی ایسے الفاظ ہوں کہ اس سے کوئی چیز لازم ہوتی ہو، لہذا اگر نذر مانتے ہوئے یہ کہا جائے کہ اگر میرا فلاں کام ہو جائے تو "ان شاءاللہ" میں یہ کام کروں گا تو ان الفاظ سے نذر منعقد نہیں ہوگی۔
مذکورہ بالا شرائط کے مطابق اگر نذر مانی جائے تو وہ نذر منعقد ہو جائے گی اور اسے پورا کرنا شرعاً واجب ہوگا۔