سوال: کیا یہ بات مستند ہے کہ نبی کریم ﷺ نے حضرت فاطمتہ الزہرا رضی اللہ تعالیٰ عنہا کو رخصت فرماتے وقت معوذتین پانی پر دم کرکے پلایا تھا؟

جواب: تاریخ خمیس میں ہے کہ حضرت علی رضی اللہ عنہ سے روایت ہے کہ مجھے شادی کے بعد آپ ﷺ نے بلایا پھر پانی منگوایا اور اس میں کلی کی ،پھر میرے پہلو اوردونوں کندھوں کے درمیان پانی چھڑکا اور ’’قل ھو اللہ احد، قل اعوذبرب الفلق، قل اعوذبرب الناس‘‘پڑھااور فرمایا:میں نے اپنے گھر کے بہتر سے تمہارا نکاح کیا۔
ایک اور روایت میں ہے کہ رخصتی کے وقت حضرت امّ ایمن حضرت فاطمہ کو ساتھ لے کرآئیں اور گھر کے ایک طرف بیٹھ گئیں اور حضرت علی دوسری جانب تھے ، آپﷺ تشریف لائے اور فرمایا :یہاں میرے بھائی ! حضرت ام ّ ایمن نے عرض کیا کہ آپ کا بھائی؟ حالانکہ آپ نے اپنی بیٹی کی شادی ان سے کی۔آپ ﷺ نے فرمایا: جی ہاں! (کیونکہ حضرت علی آپﷺ کے چچاذاد بھائی تھے ۔)پھر آپ ﷺ حضرت فاطمہ کے پاس آئے اور فرمایا: کہ پانی لاؤ،حضرت فاطمہ گھر کےپیالہ کی طرف گئیں اور پانی لے کر آئیں ،آپ ﷺ نے پانی لے کر اس میں کلی کی اورحضرت فاطمہ سے کہا :آگے آؤ، وہ آگے آئیں، آپ نے ان کے سر اور سینے پر پانی چھڑکا اور یہ دعا دی ‘‘اللهمّ انى أعيذها بك وذرّيتها من الشيطان الرجيم‘‘پھر فرمایا: پشت کرو، وہ پیچھے ہوئیں ،آپ نے ان کے دونوں مونڈھوں کے درمیان پانی چھڑکا اور یہ دعا دی ’’ اللهمّ انى أعيذها بك وذرّيتها من الشيطان الرجيم ‘‘ پھر آپ ﷺ نے فرمایا: پانی لاؤ۔حضرت علی فرماتے ہیں کہ میں سمجھ گیا کہ مجھے کہہ رہے ہیں ، چنانچہ میں کھڑا ہوا اور پانی کا پیالہ بھر لایا ، آپ ﷺ نے پانی لے کر اس میں کلی کی اور اسی طرح کیا ، جس طرح حضرت فاطمہ کے ساتھ کیا تھا اور پھر فرمایا: اب اپنے بیوی کے پاس جاؤ، بسم اللہ و البرکۃ یعنی اللہ تعالی کا نام لے لر جاؤ، اللہ تعالی برکت عطاء فرمائے۔
فائدہ :
ان روایات سے پتہ چلا کہ شب ِ رخصتی میں دولہا اور دلہن کو ایک کمرے میں بلا کر پانی پر سورۃ اخلاص اور معوذتین پڑھ کر دم کیا جائے اور اسے دلہن کے سر اور کندھوں کے درمیان چھڑکا جائے اور یہ دعا دی جائے ‘‘اللهمّ انى أعيذها بك وذرّيتها من الشيطان الرجيم‘‘ اور پھر اسی طرح ایک اور پیالہ میں پانی منگوا کر سورۃ اخلاص اور معوذتین پڑھ کر دم کیا جائے اور سے دولہا کے سر اور کندھوں کے درمیان چھڑکا جائے اور یہ دعا دی جائے ‘‘اللهمّ انى أعيذها بك وذرّيتها من الشيطان الرجيم‘‘ اور برکت کی دعا دے کر رخصت کیا جائے ، ان شاءاللہ اس عمل کی بدولت خیر و برکت ہوگی۔