سوال: رمضان المبارک میں ہمارے گھر میں تراویح ہوتی ہے جو خاندان کے حافظ بچے پڑھاتے ہیں، مرد حضرات گھر کی چھت پر نماز پڑھتے ہیں اور خواتین چھت سے متصل ایک کمرہ میں جماعت کے ساتھ نماز تراویح پڑھتی ہیں۔
اس سے متعلق چند سوالات ہیں:
۱) کیا خواتین اس طرح مردوں کے ساتھ جماعت سے نماز پڑھ سکتی ہیں؟
۲) مردوں کی صف اور متصل کمرے کے درمیان فرنیچر وغیرہ بھی ہے تو کیا عورتوں کی نماز میں کوئی نقص تو نہیں آئے گا؟
۳) مردوں کی تعداد کم ہے اس وجہ سے بعض دفعہ پوری صف بھی نہیں بنتی ہے تو کیا اتصال کی شرائط عورتوں کی نماز کے لیے بھی ہے؟

جواب: واضح رہے کہ امامت کے لیے بلوغت شرط ہے، لہذا نابالغ بچے کی اقتداء میں نماز تراویح ادا نہیں ہوگی۔
اس تمہید کے بعد سوال میں ذکر کردہ صورت میں عورتوں کے لیے بالغ امام کی اقتداء میں  پردے کا اہتمام کرتے ہوئے متصل کمرے میں جماعت سے نماز تراویح ادا ہوجائے گی، بشرطیکہ امام نے ان کی امامت کی نیت کی ہو اور انہیں امام کے انتقالات (ایک رکن سے دوسرے رکن کی طرف جانا) کا علم ہوتا ہو۔
البتہ یہ حکم چھوٹے گھر کے لیے ہے، اگر گھر بہت بڑا ہو اور عورتوں کی صف اگلی صف سے اس قدر پیچھے ہو کہ بیچ میں دو صفوں کی جگہ خالی رہ جاتی ہو تو ایسی صورت میں عورتوں کی اقتداء درست نہیں ہوگی۔