سوال: مفتی صاحب! میں فجر کی نماز مستقل 7:00 بجے پڑھتا ہوں، وقت پر نہیں پڑھ پاتا، میرے لیے کیا حکم ہے؟

جواب: پانچ نمازوں میں سے سب سے اہم نماز فجر کی ہے، اس کی اہمیت کا اندازہ اس بات سے لگائیں کہ اللہ تعالی فجر کی وقت کی قسم اٹھاتے ہیں اور فرماتے ہیں:’’قسم ہے فجر کی‘‘ ۔(سورہ فجر ، آیت نمبر:01)
اسی طرح حضرت عائشہ صدیقہ رضی اللہ عنہا سے روایت ہے کہ حضور اقدسﷺ ارشاد فرماتے ہیں کہ ’’ فجر کی دو رکعتیں دنیا و مافیہا سے بہتر ہیں ۔‘‘ (صحیح مسلم، حدیث نمبر:725)
فجر کی باجماعت نماز ایک مسلمان کی صداقت اور اس کا ایمان پرکھنے کی کسوٹی ہے، چنانچہ عبداللہ بن عمر رضی اللہ عنہ فرماتے ہیں : ’’ہم اگر فجر اور عشاء کی نماز میں کسی آدمی کو نہ پاتے تو اس کے بارے میں اچھا گمان نہیں رکھتے تھے۔ (المعجم الکبیر للطبرانی)
جناب رسول اللہﷺ نے فرمایا: جو شخص سورج نکلنے سے پہلے اور سورج ڈوبنے سے پہلے کی نمازیں یعنی فجر اورعصر پڑھتا ہے، وہ ہرگز جہنم کی آگ میں داخل نہیں ہوگا۔ فجر کی نماز جنت کی ضمان ہے۔(صحیح مسلم، حدیث نمبر: 634)
رسول اللہ ﷺنے ارشاد فرمایا: جو شخص دو ٹھنڈی نمازیں (یعنی فجر اور عصر) پابندی سے پڑھتا ہے وہ جنت میں داخل ہوگا۔(صحیح بخاری، حدیث نمبر :574)
حضرت عبداللہ رضی اللہ عنہ سے روایت ہے کہ جناب رسول اللہﷺ کے سامنے ایسے شخص کا تذکرہ کیا گیا، جو صبح ہونے تک سوتا رہتا ہے (یعنی فجر کی نماز ادا نہیں کرتا ہے) تو آپ ﷺ  نے ارشاد فرمایا: ایسے شخص کے کانوں میں شیطان پیشاب کردیتا ہے۔ (صحیح بخاری، حدیث نمبر:1144)
فجر کی نماز میں اٹھنے کے لیے چند تراکیب ہیں:(1)رات کو حتی الامکان جلدی سوئیں(2)سوتے وقت فجر کی نماز جماعت سے ادا کرنے کا پختہ ارادہ کریں اور ارادہ کرنے میں مخلص بھی ہوں(3) ایسے اسباب اختیار کریں، جن سے فجر کی نماز کے لئے اٹھنا آسان ہو۔ مثلاً: الارمAlarm والی گھڑی میں مناسب وقت پر الارم سیٹ کرکے اس کو مناسب جگہ پر رکھیں، اگر ان امور کی رعایت کرکے سوئیں گے تو ان شاء اللہ فجر کی نماز جماعت کے ساتھ ادا کرنا آسان ہوگا، پھر بھی اگر کسی دن اتفاق سے بیدار ہونے میں تاخیر ہوجائےتو جس وقت بھی آنکھ کھلے، سب سے پہلے نماز ادا کرلیں، ان شاء اللہ تاخیر کا کوئی گناہ نہیں ہوگا، لیکن اس کو معمول بنانا گناہ پر مداومت کرنا ہے جو کسی بھی طرح جائز نہیں ہے۔