سوال: جھینگے کھانے سے متعلق شریعت کیا حکم دیتی ہے؟

جواب: جھینگے(Prawns) کے حلال و حرام ہونے میں فقہا کا اختلاف ہے، بعض فقہاء اس کے حلال ہونے کے قائل ہیں اور بعض حرام ہونے کے، اس اختلاف کی وجہ اس بات میں اختلاف ہے کہ جھینگا مچھلی کی اقسام میں سے ہے یا نہیں؟ تو جن فقہاء نے اسے مچھلی کی اقسام میں سے مانا ہے، وہ اس کا کھانا جائز قرار دیتے ہیں اور جو اسے مچھلی کے اقسام میں سے شمار نہیں کرتے وہ اسے نا جائز قرار دیتے ہیں۔
مفتی تقی عثمانی صاحب دامت برکاتہم کا تفصیلی مقالہ اس پر موضوع تکلملہ فتح الملھم اور فقہی مقالات میں موجود ہے، جس کا خلاصہ یہاں درج کردیا جارہا ہے:
جھینگا کو تقریباً اردو عربی کے تمام ماہرین لغت مچھلی کے اقسام میں سے مانتے ہیں اور علامہ دمیری نے بھی حیاةالحیوان میں اسے مچھلی کے اقسام میں سے ہی شمار کیا ہے اور اس کا مچھلی کے اقسام میں سے ہونے کا تقاضا یہ ہے کہ کہ یہ حلال ہو، لیکن اس دور کے ماہرین علم حیوانات اسے مچھلی کے اقسام میں سے نہیں مانتے، بلکہ وہ اس کو کیکڑے کی اقسام میں سے مانتے ہیں، کیونکہ مچھلی کے اندر دو خاصیتیں ضرور ہوتی ہیں (1) گلپھڑوں سے سانس لے (2)اس میں ریڑھ کی ہڈی موجود ہو. اور جھینگا میں یہ دونوں باتیں نہیں پائی جاتیں، اس لیے اس کا تقاضا یہ ہے کہ یہ ناجائز ہو۔
لیکن لوگوں عرف عام میں اسے مچھلی ہی شمار کیا جاتا ہے اور شرعی معاملات میں جواز اور عدم جواز کے معاملے فنی باریکیوں سے زیادہ اہمیت عرف عام کی ہے، لہذا اس کا اعتبار کرتے ہوئے اس کو مچھلی کی اقسام میں سے ہی شمار کیا جائے گا اور اس کے کھانے میں شدت اختیار کرتے ہوئے اس کے کھانے کو ناجائز قرار نہیں دیا جائے گا اور پھر جبکہ اس کے بارے میں فقہاء کا اجتہادی اختلاف بھی ہے، اس کا تقاضہ بھی یہی ہے کہ اس کے حکم میں تخفیف ہو جائے اور اس کے کھانے کو ناجائز قرار نہ دیا جائے، بلکہ کھانا جائز ہو۔
لہٰذا جھینگا کھانا جائز تو ہے، البتہ بہتر اور اولی یہ ہوگا کہ جھینگا نہ کھایا جائے۔