سوال:
میرے بچے بیڈ کے فوم پر اکثر پیشاب کردیتے ہیں، کیا میں اس پر پاک چادر بچھا کر نماز پڑھ سکتی ہوں؟
جواب: واضح رہے کہ فوم کے گدے پر نماز پڑھتے ہوئے یہ اطمینان کر لیا جائے کہ سجدہ میں پیشانی کسی ایک جگہ ٹک جائے، تب نماز ادا ہو جائے گی اور اگر فوم اتنا موٹا ہو کہ پیشانی اندر دھنستی چلی جائے اور کسی ایک جگہ نہ ٹکےتو نماز ادا نہیں ہوگی۔
اس تفصیل کے بعد آپ کے سوال کا جواب یہ ہے کہ اگر گدے پر گیلی نجاست لگی ہو تو اس پر نماز پڑھنا درست نہیں جب تک اس کو پاک نہ کر لیا جائے، البتہ اگر اس گیلی نجاست کے اوپر ایسی پاک پلاسٹک کی شیٹ یا ایسا پاک موٹا کپڑا / چادر بچھادی جائے، جس کے اوپر والے حصہ پر نجاست سرایت نہ کرے تو اس پر نماز پڑھنا درست ہے، البتہ اگر نجاست خشک ہو چکی ہو، جس کے اثرات بستر پر موجود ہوں تو اس پر بچھائی جانے والی پاک چادر اگر اتنی موٹی ہو جس سے بستر کی نجاست چھپ جائے یا اس نجاست کی بدبو چادر کے اوپر سے نہ سونگھی جا سکتی ہو تو ایسی چادر بچھاکر نماز پڑھنا درست ہے، بشرطیکہ نماز کی باقی شرائط بھی پائی جائیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:
الدر المختار مع رد المحتار: (باب صفة الصلاة، 454/1، ط: دار الفکر)
"وشرط سجود فالقرار لجبہة۔۔۔۔قال ابن عابدین: قولہ: (فالقرار لجبہة) أی: یفترض أن یسجد علی ما یجد حجمہ بحیث ان الساجد لو بالغ، لا یتسفل رأسہ أبلغ مما کان علیہ حال الوضع، فلا یصح علی نحو الأرز والذرة الا أن یکون فی نحو جوالق، ولا علی نحو القطن والثلج والفرش الا ان وجد حجم الأرض بکَبسِہ".
و فیہ ایضا: (387/2)
"وکذا الثوب إذا فرش علی النجاسۃ الیابسۃ، فإن کان رقیقا یشف ماتحتہ، أو توجد منہ رائحۃ النجاسۃ علی تقدیر أن لہا رائحۃ لاتجوز الصلوۃ علیہ، وإن کان غلیظا بحیث لا یکون کذلک جازت".
واللہ تعالٰی اعلم بالصواب
دارالافتاء الاخلاص،کراچی