سوال: السلام علیکم، حضرت ! سوال یہ ہے کہ کیا برائیلر مرغی حرام ہے؟ کچھ علماء کرام جیسے ڈاکٹر امجد صاحب نے اِس کو حرام قرار دیا ہے۔ برائے مہربانی وضاحت کیجیے۔

جواب: شرعی طور پر ذبح شدہ برائلر مرغی کا کھانا حلال ہے، محض لوگوں کی افواہوں کی بنا پر کسی چیز کو حرام قرار نہیں دیا جاسکتا ہے۔
البتہ اگر مرغی کی غذا (فیڈ)  میں حرام ونجس اجزاء مثلاً: خون ، جانور کے اجزاء یا مردار کا گوشت وغیرہ شامل کیا جاتا ہو تو ایسا کرنا جائز نہیں ہے، البتہ اس قسم کی غذاء کا حکم یہ ہے کہ نجس و حرام اجزاء کے ملنے کی وجہ سے یہ غذا بھی حرام ہے اور ایسا کرنا یعنی فیڈ  میں نجس و حرام اجزاء شامل کرنا جائز نہیں- 
واضح رہے کہ جن مرغیوں کو ایسی غذاء کھلائی گئی ہو، ان کے بارے میں شرعی حکم یہ ہے کہ اگر ان کے گوشت میں مذکورہ غذا کی بدبو پیدا نہیں ہوئی ہے، تو اس صورت میں ان مرغیوں کو کھانا جائز ہوگا اور اگر مذکورہ غذاء کی وجہ سے ان کے  گوشت میں بدبو پیدا ہوگئی ہو، تو جب تک بدبو زائل نہیں ہوجاتی، اس وقت تک ایسی مرغیوں کو کھانا جائز نہیں ہوگا۔