سوال: حضرت ، ایک شخص بنوں سے تعلق رکھتا ہے، 16 سال سے اسلام آباد میں ایجوکیشن اور جاب كے سلسلے میں مقیم تھا، پِھر سعودیہ چلا گیا، والدین بنوں سے پشاور شفٹ ہو چکے ہیں، پاکستان آنے پر والدین کے ساتھ مقیم رہتا ہے، لیکن 15 دن نہیں گزارتا، سسرال اسلام آباد میں ہے اور وہاں بھی جانا ہوتا رہتا ہے.
اِس بار اسلام آباد میں ایک ضروری کام كے تحت 15 دن گزارے اور ان 15 دنوں میں پوری نماز پڑھی، لیکن پِھر دیگر شہروں میں چلا گیا، جب پاکستان 1 سال بعد آنا ہوتا ہے تو ان تمام شہروں میں آنا جانا لگا رہتا ہے۔
حضرت ! مندرجہ ذیل سوالات کے جواب کی گزارش ہے:
سوال 1: یہ شخص کہاں پوری نماز پڑھے گا؟
سوال 2: جس شہر میں بندے کی کوئی زمین ہو۔ کیا اسکو وہاں پوری نماز پڑھنی پڑے گی ؟ چاھے وہ وہاں رہتا نہ ہو۔
سوال 3: جس شہر میں بندہ ایک بار پوری نماز پڑھ لے، تو وہاں شفٹ ہونے کے بعد بھی ہمیشہ وہاں پوری نماز پڑھنی پڑتی ہے ؟

جواب: 1) واضح رہے کہ یہ شخص سعودیہ میں پوری نماز ادا کرے گا، اور اگر یہ شخص سعودیہ جانے سے پہلے اسلام آباد میں مستقل رہائش کی نیت سے مقیم رہا ہے، اور سعودیہ سے واپسی پر بھی اسلام آباد کو ہی مستقل رہائش بناتا ہے، تو یہ شخص اسلام آباد میں پوری نماز ادا کرے گا، اس کے علاؤہ جس شہر میں پندرہ دن سے کم قیام کرے گا وہاں نماز قصر کرے گا۔
2)جس شہر میں بندہ کی زمین ہو، مگر رہنے کا ارادہ نہ ہو تو وہاں نماز قصر کرے گا۔
3) ایک بار پوری نماز پڑھنا، یہ کوئی معیار نہیں ہے، بلکہ اتمام یعنی پوری نماز ادا کرنے کا معیار یہ ہے کہ اگر وہ کسی جگہ پندرہ دن یا اس سے زائدیا مستقل رہائش اختیار کرنے کا ارادہ رکھتا ہے تو اس صورت میں اسے مکمل نماز پڑھنی ہوگی۔