سوال: حضرت، پوچھنا یہ تھا کہ آپ نے بچوں کو تصویر والے کپڑے پہیننے کے بارے میں بتایا تھا کہ ایسا کرنا حرام ہے۔
اب پوچھنا یہ ہے کہ جیسا کے آپکو معلوم ہے، موبائل کیمرہ ہر وقت، ہر جگہ اور ہر کسی کے پاس موجود ہوتا ہے تو لوگ بچے کی بھی تصویر کھینچتے ہیں تو مجھے اکثر لوگ اِس بات پر تنقید کرتی ہیں کہ آپ تصویر والے کپڑے تو نہیں پہناتے، لیکن تصویر کھینچنےسے کیسے بچ سکتے ہیں تو کیا موبائل سے بچوں کی تصویر کھینچنا بھی حرام میں آتا ہے ؟

جواب: سابقہ فتویٰ میں جو تصویر والے کپڑے سے منع کیا تھا، اس کی وجہ یہ تھی کہ کپڑوں میں پرنٹڈ (Printed) اور مستقل تصویر ہوتی ہے، جو تمام علماء کے نزدیک بالاتفاق حرام ہے، البتہ ڈیجیٹل تصویر سے متعلق بہت سے علماء اس بات پر متفق ہیں کہ ڈیجیٹل تصویر مستقل کوئی تصویر نہیں ہوتی، بلکہ شعاعوں کو جمع کرکے تصویر بنی ہوتی ہے، ان علماء کے نزدیک یہ تصویر نہیں، بلکہ عکس ہوتا ہے، جس کو سامنے بھی لایا جاسکتا ہے اور مٹایا بھی جاسکتا ہے، اس لیے ڈیجیٹل تصویر اصل تصویر کے حکم میں نہیں ہے، لھذا اگر کوئی کھینچ لے تو اس کی گنجائش ہے، البتہ ان علماء کے نزدیک بھی بلا ضرورت ڈیجیٹل تصویر سے بچنا بہتر ہے ۔