سوال: السلام علیکم، مفتی صاحب ! میرا سوال یہ ہے کہ اگر آپ سے صبح کی نماز قضاء ہو گئی اور پھر آپ ظہر کی نماز پڑھنے آئے تو جماعت کھڑی ہو اور آپ کو قضاء نماز پڑھنے کا وقت نہ ملے اور آپ جماعت میں شامل ہو جائیں تو کیا آپ کی صبح کی قضاء نماز بغیر پڑھے ادا ہو جائیگی؟ کیوں کہ میں نے سنا ہے کہ اگر صبح کی نماز قضاء ہو گئی تو پھر سب سے پہلے آپ نے قضاء پڑھنی ہے، پھر دوسری نماز پڑھنی ہوگی۔

جواب: واضح رہے کہ اگر مذکورہ شخص صاحبِ ترتیب(جس کے ذمہ چھ  یا اس سے زیادہ نمازیں بلوغ کے بعد سے باقی نہ ہوں ) ھو، تو اس کے لیے  قضا نماز کو فرض نماز سے پہلے ہی ادا کرنا لازم ہے، البتہ اگر وقت تنگ ھو تو صاحبِ ترتیب بھی پہلے وقتی نماز پڑھے گا، پھر اس کے بعد قضاء نماز پڑھے گا۔
اور اگر اس کے ذمہ چھ نمازیں یا اس سے زیادہ  بلوغ کے بعد سے باقی ہوں اور صاحبِ ترتیب نہ ھو تو اگر  موجودہ نماز  پہلے پڑھ لے اور قضا شدہ نماز بعد میں پڑھے تو اس کی بھی گنجائش ہے،اور فجر کی قضاء پہلے پڑھے اور ظہر کی نماز بعد میں پڑھے تو اس کی بھی گنجائش ہے۔