سوال: السلام عليكم, اللہ‎ پاک سے امید ہے کہ سب خیریت سے ہونگے، پوچھنا یہ ہے کہ کچھ لوگ کہتے ہیں کہ کھانا کھاتے وقت دنیا کی باتیں کرنا گناہ ہے اور کچھ لوگ کہتے ہیں کہ کھانا کھاتے وقت صرف دین کی باتیں کرنا جائز ہے تو اس میں اصل حکم کیا ہے؟ رہنمائی فرما دیں جزاک اللہ

جواب: کھانا کھانے کے دوران دینی اور دنیاوی دونوں طرح کی باتیں کرنا جائز ہے، تاہم اس میں مجلس کے آداب اور گفتگو کے سلیقے کا خیال رکھنا چاہیے۔
نبی اکرم صلی اللّٰہ علیہ وسلم سے کھانے کے دوران گفتگو کرنا احادیث مبارکہ سے ثابت ہے۔
صحیح مسلم کی روایت ہے:
عَنْ جَابِرِ بْنِ عَبْدِ اللَّهِ أَنَّ النَّبِيَّ صَلَّى اللَّهُ عَلَيْهِ وَسَلَّمَ سَأَلَ أَهْلَهُ الْأُدُمَ, فَقَالُوا: مَا عِنْدَنَا إِلَّا خَلٌّ, فَدَعَا بِهِ, فَجَعَلَ يَأْكُلُ بِهِ وَيَقُولُ: " نِعْمَ الْأُدُمُ الْخَلُّ نِعْمَ الْأُدُمُ الْخَلُّ".
(رواه مسلم: رقم الحديث: ٢٠٥٢ )
ترجمہ:
حضرت جابر رضی اللہ عنہ سے مروی ہے کہ نبی صلی اللہ علیہ وسلم نے اپنے گھر والوں سے سالن کے بارے میں دریافت کیا، تو انھوں نے عرض کیا کہ گھر میں تو سرکہ کے سوا کوئی چیز نہیں، آپ نے اسے ہی طلب کرلیا، چنانچہ اسے کھاتے جاتے تھے اور کہتے جاتے تھے : "سرکہ کیا خوب سالن ہے، سرکہ کیا خوب سالن ہے"۔
اس حدیث کی تشریح میں امام نووی رحمہ اللّٰہ فرماتے ہیں:
اس حدیث مبارک میں جہاں کھانے کے دوران بات کرکے کھانا کھانے والوں کو مانوس کرنا جائز ہے اور ایسا کرنا مستحب بھی ہے۔
(شرح صحیح مسلم الإمام النووی رحمه الله: ٧/ ١٤)