سوال: السلام علیکم، مفتی صاحب! مسجد میں اذان کے وقت "حی علی الصلاۃ" اور "حی علی الفلاح" کے جواب میں کیا کہنا چاہیے؟

جواب: حدیث شریف میں آتا ہے کہ حضرت عمر بن خطاب رضی اللہ تعالیٰ عنہ سے روایت ہے کہ رسول اللہﷺ نے فرمایا: ’’جب مؤذن اللهُ أَكْبَرُ اللهُ أَكْبَرُ کہے تو تم میں سے (ہر) ایک اللهُ أَكْبَرُ اللهُ أَكْبَرُ كہے، پھر جب (مؤذن) أَشْهَدُ أَنْ لَا إِلَهَ إِلَّا اللهُ کہے تو وہ بھی أَشْهَدُ أَنْ لَا إِلَهَ إِلَّا اللهُ کہے، پھر جب(مؤذن) أَشْهَدُ أَنَّ مُحَمَّدًا رَسُولُ اللهِ کہے تو وہ بھی أَشْهَدُ أَنَّ مُحَمَّدًا رَسُولُ اللهِ کہے، پھرجب (مؤذن) حَيَّ عَلَى الصَّلَاةِ کہے تو وہ لَا حَوْلَ وَلَا قُوَّةَ إِلَّا بِاللهِ کہے، پھر جب مؤذن حَيَّ عَلَى الْفَلَاحِ کہے تو وہ لَا حَوْلَ وَلَا قُوَّةَ إِلَّا بِاللهِ کہے، پھر جب(مؤذن) اللهُ أَكْبَرُ اللهُ أَكْبَرُ کہے تو وہ بھی اللهُ أَكْبَرُ اللهُ أَكْبَرُ کہے، پھر جب (مؤذن) لَا إِلَهَ إِلَّا اللهُ کہے تو وہ بھی اپنے دل سے لَا إِلَهَ إِلَّا اللهُ کہے تو وہ جنت میں داخل ہو گا‘‘۔ (صحیح مسلم، حدیث نمبر:385)
مذکورہ بالا حدیث سے معلوم ہوا کہ حَيَّ عَلَى الصَّلَاةِ اور حَيَّ عَلَى الْفَلَاحِ کے جواب میں لَا حَوْلَ وَلَا قُوَّةَ إِلَّا بِاللهِ کہنا چاہیے، خواہ اذان سننے والا مسجد میں ہو یا مسجد سے باہر ہو، دونوں کے لیے ایک ہی حکم ہے۔