سوال: معزز مفتی صاحب ! رہنمائی فرما دیں:میں جس مکان میں رہتا ہوں، اس گھر میں پرانے کرایہ دار (tenant) کی ڈاک آتی رہتی ہے، میں نے ان سے رابطہ کیا اور وہ اپنی ڈاک لینے کے لئے گھر آگئے اور ساتھ میں حلال چاکلیٹ بھی لے آئے، لیکن دیتے وقت کچھ یوں کہہ دیا:Hey! merry Christmas تو کیا ایسی صورت میں اس کا استعمال جائز ہوگا؟

جواب: واضح رہے کہ اس مسئلہ میں ایک اصول سمجھنے کی ضرورت ہے، وہ یہ کہ مذکورہ مسئلہ میں اصل مسئلہ اس ھدیہ (گفٹ) کے قبول کرنے کا ہے کہ اسے غیر مذہب کی ترویج و اشاعت کی بنا پر قبول نہیں کرنا چاہیے، کیونکہ کرسمس وغیرہ ان کے عقائد اور عبادت کی بناء پر ہوتے ہیں، اب اگر وہ لاعلمی میں وصول کرلیا ہے، تو اس کے کھانے کا حکم یہ ہے کہ اگر ھدیہ (گفٹ) وغیرہ کے متعلق یہ یقین ہو کہ انہوں نے اپنے باطل معبودوں کے نام پر نہیں چڑھایا ہے اور نہ ہی اس میں کسی حرام و ناپاک چیز کی آمیزش ہے، نیز دینے والوں کی آمدنی بھی حلال ہو تو اس کا استعمال جائز ہے۔
چونکہ ان تمام باتوں کا پتا چلانا مشکل ہے، اس لیے اس کو کھانے میں احتیاط برتنی چاہیے۔
مزید یہ کہ اگر غیر مسلم اپنے تہوارکے موقع پر کوئی چیز پیش کرے تو اسے تہوار کی مبارک باد ہرگز نہ دی جائے۔