سوال: مفتی صاحب! ہم لوگ بعض اوقات تراویح وغیرہ کے لیے ڈیکوریشن والوں سے دریاں لاتے ہیں، جس کی پاکی اور ناپاکی کا معلوم نہیں ہوتا ہے تو کیا ایسی مشکوک دریوں پر نماز پڑھنے سے نماز ہوجاتی ہے؟

جواب: واضح رہے کہ نماز کی درستگی کے لیے جگہ کا پاک ہونا ضروری ہے، لہذا اگر کسی جگہ کا یقینی طور پر ناپاک ہونا معلوم ہو تو اس جگہ نماز ادا نہیں ہوگی، تاہم محض شک و شبہ کا اعتبار نہیں ہے، لہذا اگر سوال میں ذکر کردہ دریوں کا ناپاک ہونا یقینی طور سے معلوم نہ ہو تو ان پر نماز پڑھنے سے نماز ہو جائے گی، البتہ بہتر یہ ہے کہ شک و شبہ سے بچنے کے لیے ان دریوں کے اوپر کوئی پاک کپڑا بچھادیا جائے۔