سوال: مفتی صاحب ! کیا تہجد کے لیے رات کو سونا لازمی ہے اور کیا رات بارہ بجے کے بعد کبھی بھی پڑھ سکتے ہیں؟

جواب: تہجد کی نماز کیلئے سوکر اٹھنا ضروری نہیں ہے، بلکہ سوئے بغیر بھی پڑھ سکتے ہیں، البتہ سوکر اٹھنے کے بعد تہجد پڑھنا افضل ہے، عام طور پر سوکر اٹھنے کے بعد نفل پڑھنے کو "تہجد" کہا جاتا ہے، کیونکہ جس قدر بھی رات کا حصہ متاخر ہوتا جاتا ہے، برکات اور رحمتیں زیادہ ہوتی چلی جاتی ہیں، اور رات کے آخری پہر میں سب حصوں سے زیادہ برکات پائی جاتی ہیں۔
رسول اللہ ﷺ اور صحابۂ کرام ؓ کا معمول عام طور سے یہی رہا کہ آخر رات میں بیدار ہوکر نماز پڑھتے تھے، اس لئے افضل یہی ہے کہ تہجد کی نماز سوکر اٹھ کر رات کے آخری پہر میں پڑھی جائے۔
نوٹ: یہ حکم اس وقت ہے، جب بندے کو سونے سے پہلے یا بعد میں تہجد پڑھنے میں تردد ہو، لیکن اگر کسی کو کسی وجہ سے نیند ہی نہیں آئی اور وہ رات کے آخری حصہ تک جاگتا رہا، تو اس کے حق میں تہجد کیلئے پہلے سونے کو ضروری سمجھنا بھی درست نہیں ہے۔
نیز تہجد کی رکعات دو سے لیکر بارہ تک مختلف تعداد روایات میں منقول ہے، البتہ آنحضرت ﷺ کا عام معمول آٹھ رکعات پڑھنے کا تھا، اس لیے آٹھ رکعات پڑھنی بہتر ہے، ورنہ جتنی رکعات باآسانی ہوسکے، پڑھ سکتے ہیں۔