سوال: السلام علیکم، مفتی صاحب ! نماز فجر، نماز عصر اور نماز مغرب سے نماز عشاء کے درمیان سونا شرعاً کیسا ہے؟

جواب: نمازِ فجر کے بعد بغیر کسی ضرورت کے طلوع آفتاب(سورج نکلنے) سے پہلے سونا مکروہ ہے، حدیث میں آتا ہے کہ اللہ تبارک وتعالی صبح صادق سے لے کر طلوع آفتاب تک مخلوق کے لیے رزق تقسیم کرتے ہیں، یعنی جو لوگ اس پورے وقت میں غافل رہتے ہیں، وہ رزق کی برکت سے محروم رہتے ہیں۔

اسی طرح نماز عصر کے بعد سے مغرب تک بلا کسی عذر کے سونا مکروہ ہے، ایک ضعیف حدیث میں آتا ہے کہ عصر کے بعد سونے سے عقل زائل ہو جاتی ہے، البتہ مغرب سے عشاء تک اس شخص کے لیے سونا مکروہ ہے، جس کو یہ اندیشہ ہو کہ اگر وہ سوگیا، تو عشاء کے لیے بیدار نہیں ہوگا، اور عشاء کی نماز فوت ہوجائے گی، لیکن اگر کسی کو یقین ہو کہ میں ضرور اٹھ جاؤنگا، تو پھر سونے میں کوئی مضائقہ نہیں ہے۔