سوال: السلام علیکم، مفتی صاحب ! آج کل کے زمانے میں گھوڑا جہاد کے لیے استعمال نہیں ہوتا ہے، تو کیا اس کے باوجود گھوڑا کھانا مکروہ رہے گا؟

جواب: اگرچہ موجودہ زمانے میں گھوڑے کا استعمال بطور آلات جہاد کم ہوگیا ہے، لیکن بالکلیہ اس کا استعمال ختم نہیں ہوا، کیونکہ اب بھی ہر فوج کے اندر ایک شعبہ اور ریجمنٹ (Animal Transport Regiment)
کے نام سے موجود ہوتی ہے، جو گھوڑوں کے لیے ہی مخصوص ہوتی ہے، لہذا گھوڑے کا فی نفسہ استعمال فوجی نظام میں موجود ہے۔
اور نبی اکرم صلی اللّٰہ علیہ وسلم کا ارشاد ہے:
روى البخاري (2852) ، ومسلم (1873) عَنْ عُرْوَةَ بْنِ الجَعْدِ رضي الله عنه ، عَنِ النَّبِيِّ صَلَّى اللهُ عَلَيْهِ وَسَلَّمَ قَالَ: "الخَيْلُ مَعْقُودٌ فِي نَوَاصِيهَا الخَيْرُ إِلَى يَوْمِ القِيَامَةِ : الأَجْرُ وَالمَغْنَمُ".
ترجمہ:
گھوڑے کی پیشانی میں قیامت تک کے لیے خیر و بھلائی رکھ دی گئی ہے۔
محدثین کے نزدیک اس سے مراد وہ گھوڑے ہیں جو جہاد فی سبیل اللہ کے لیے تیار کیے جاتے ہیں۔
اس لیے فقہاء حنفیہ میں سے امام ابوحنیفہ رحمہ اللّٰہ نے اس کے گوشت کو مکروہ تحریمی قرار دیا ہے، اور امام ابویوسف و امام محمد رحمہما اللہ کے نزدیک گھوڑے کا گوشت حلال ہے، لیکن مکروہ تنزیہی ہے، لہذا احتیاط کا تقاضہ یہ ہے کہ گھوڑے کا گوشت نہ کھایا جائے۔