سوال: السلام علیکم، مفتی صاحب !میرا بھائی اپنے بیوی بچوں کے ساتھ اسلام آباد میں رہتا ہے، جب وہ اور بھابھی اپنے والدین سے ملنے پشاور آئیں گے تو پوری نماز پڑھیں گے یا قصر کریں گا؟ یاد رہے کہ بھائی اور بھابھی دونوں کے والدین پشاور میں رہتے ہیں۔

جواب: صورت مسئولہ میں اگر آپ کے بھائی اپنے اہل و عیال کے ساتھ اسلام آباد منتقل ہوکر وہاں مستقل رہائش کی نیت کرچکے ہیں، اور پشاور میں رہائش کو مکمل طور پر ترک کر چکے ہیں، اور والدین سے ملنے کی غرض کے علاوہ پشاور میں جاکر رہنے کا کوئی ارادہ نہیں ہے، تو چوں کہ اس صورت میں پشاور آپ کے بھائی کا وطنِ اصلی نہیں رہا، اس لیے اگر وہ پندرہ دن سے کم کے لیے وہاں جائیں گے، تو وہاں قصر کریں گے۔
نیز آپ کے بھائی کی اہلیہ شادی ہوکر اسلام آباد منتقل ہوچکی ہیں، اس لئے پشاور ان کا وطن اصلی نہیں رہا، لہذا اگر وہ پندرہ دن سے کم کے لیے پشاور جائیں گی، تو وہاں قصر کریں گی۔