سوال: السلام علیکم، مفتی صاحب ! اگر کسی شخص نے اپنی زندگی میں پابندی سے نمازیں نہ پڑھیں ہوں، اور ان کی اولاد ان کے لیے کوئی نیکی کا کام کرنا چاہے، تو کونسا عمل افضل ہے، تاکہ ان کی نجات کا سامان ہو۔
مزید یہ بھی رہنمائی فرمادیں کہ اگر نمازوں کافدیہ دینا ہو، تو کیسے اور کس حساب سے دیا جائے؟

جواب: واضح رہے کہ کسی شخص کی زندگی میں اس کے ذمہ قضا نمازیں باقی رہ گئی ہوں اور اس نے ان قضا نمازوں کا فدیہ دینے کی وصیت بھی نہ کی ہو، تو ورثاء پر ان نمازوں کا فدیہ ادا کرنا لازم نہیں ہے، البتہ ورثاء اگر اپنے مرحوم کی آخرت کے حساب سے سبکدوشی کے لیے، از خود اس کی طرف سے اس کی نمازوں کا فدیہ ادا کردیں، تو فدیہ ادا ہوجائے گا اور ورثاء کا اپنے مرحوم کے لیے ایسا کرنا اس پر بڑا احسان ہوگا۔
لہذا ایک نماز کا فدیہ ایک صدقہ فطر کے برابر ہوتا ہے اور روزانہ وتر کے ساتھ چھ نمازیں ہیں، تو ایک دن کی نمازوں کے فدیے چھ صدقہ فطر کے برابر ہوں گے، اور ایک صدقہ فطر تقریباً پونے دو کلو گندم یا آٹا یا اس کی قیمت ہے۔
لہذا کسی مستحق کو فی نماز کے حساب سے پونے دو کلو گندم یا اس کی قیمت دینے سے نمازوں کا فدیہ ادا ہوجائے گا۔
اور اللہ تعالٰی کی رحمت سے قوی امید ہے کہ مرحوم سے آخرت میں مؤاخذہ نہیں فرمائیں گے۔