سوال: مفتی صاحب ! یہ جو کرونا وائرس سے حفاظت کیلئے اپنے گھروں پر اذان دینے کا کہا جارہا ہے، کیا اس کی کوئی شرعی حیثیت ہے؟

جواب: وبا کے موقع پر اذان دینا سنت اور مستحب نہیں ہے، اور نہ ہی کوئی شرعی حکم ہے،اس لئے اسے سنت یا مستحب سمجھ کر کرنا درست نہیں ہے، البتہ اگر دفع مصیبت کے لئے بطورِ علاج مذکورہ موقع پر شرعی حدود کا خیال کرتے ہوئے اذان دی جائے، تو فی نفسہ اذان دینا مباح ہے، لیکن دیکھا گیا ہے کہ لوگوں کی طرف سے اس موقع پر شرعی حدود کی رعایت نہیں کی جاتی، مثلاً: بہت سے لوگ اس موقع پر اذان دینے کو دین کا حصہ سمجھتے ہیں اور اس کے لئے خاص رات کا وقت مقرر کیا جاتا ہےاور اجتماعی طور پر بیک وقت اذان دینے کی ترغیب دی جا رہی ہے اور اس کا حد درجہ اہتمام ہونے لگا ہے کہ آگے چل کر اس کے مستقل بدعت بن جانے کا اندیشہ ہے، لہذا احتیاط اسی میں ہے کہ وبا کے اس خاص موقع پر اذان کا اہتمام کرنے سے اجتناب کیا جائے۔