سوال: السلام علیکم، مفتی صاحب ! اِس سال اعتکاف میں پتہ چلا کہ دوسری رکعت کے قعدہ میں التحیات کے بعد درود شریف بھی پڑھنی ہے اور دعا بھی، پھر تیسری رکعت کے لیے کھڑا ہونا ہے اور کھڑے ہوتے ہی تیسری رکعت میں پہلے ثناء پڑھنی ہے اس کے بعد تیسرا کلمہ اور پھر باقی نماز پوری کرنی ہے، رہنمائی فرمائیں کہ کیا ایسا کرنا ہے یا جس انداز سے ہمیشہ صلوة التسبیح پڑھی (یعنی التحیات کے بعد درود شریف اور دعا پڑھے بغیر تیسری رکعت کے لیے کھڑے ہو گئے اور تیسری رکعت میں ثناء بھی نہیں پڑھی) اور جس طرح آپ نے بھی جواب دیا، اس طرح نماز پڑھنی ہے؟
اس کے ساتھ اعتکاف میں یہ بھی بتایا گیا ہے کہ صرف صلوة التسبیح کا یہ طریقہ نہیں بلکہ غیر موکدہ سنتیں بھی اسی طرح پڑھنی ہے، تو کیا یہ بات درست ہے؟

جواب: سنت غیر مؤکدہ اور نوافل میں ہر دو رکعت کی حیثیت مستقل نماز کی ہے، اس لیے افضل یہ ہے کہ ہر قعدہ میں تشہد کے ساتھ ساتھ درود بھی پڑھے، اور ہر قعدہ کے بعد اگلی رکعت میں ثناء اور تعوذ بھی پڑھے۔