سوال: مفتی صاحب! یہ تو مجھے معلوم ہے کہ والدین کا احترام ضروری ہے، لیکن میرے ایک دوست نے کہا کہ اگر کوئی شخص نماز پڑھ رہا ہو، اور والدین اس کو بلائیں، تو اس کے لیے ضروری ہے کہ وہ نماز توڑ کر والدین کی بات کا جواب دے، کیا یہ بات درست ہے؟ کیا والدین کے بلانے پر نماز توڑی جا سکتی ہے؟

جواب: واضح رہے کہ اگر نمازی فرض نماز پڑھ رہا ہو، تو والدین کے بلانے پر وہ اپنی نماز نہیں توڑ سکتا، الا یہ کہ والدین کسی ناگہانی آفت میں مبتلا ہو کر اس کو پکاریں، (اس صورت میں والدین کی خصوصیت نہیں، بلکہ کسی کی بھی جان بچانے کے لیے نماز توڑنا ضروری ہے) اور اگر نفل نماز پڑھ رہا ہو، اور والدین کو اس کی نماز کا علم ہو، تو نماز نہیں توڑے گا، اور اگر ان کو علم نہ ہو، تو نماز توڑ کر ان کی بات کا جواب دینا چاہیے۔