سوال: ہمارے علاقے میں اکثر خواتین ساڑھی پہنتی ہیں اور ان میں سے اکثر خواتین بیٹھ کر نماز پڑھتی ہیں، حالانکہ ان کو کوئی بیماری یا معذوری نہیں ہے، کیا ان کا یہ عمل درست ہے؟

جواب: فرض نماز بغیر کسی عذر کے بیٹھ کر پڑھنےسے ادا نہیں ہوتی ، کیونکہ قیام نماز کے ارکان میں سے ہے اور اصول یہ ہے کہ نماز کا کوئی رکن فوت ہو جائے تو نماز نہیں ہوتی، لہذا جو خواتین فرض نماز بغیر کسی عذر کے بیٹھ کر پڑھتی ہیں، ان کی نماز نہیں ہوتی، البتہ نفل نماز بغیر عذر کےبھی بیٹھ کر پڑھنے کی اجازت ہے، لیکن بیٹھ کر نماز پڑھنے کی صورت میں کھڑے ہوکر نماز پڑھنے کے مقابلے میں ثواب آدھا ملے گا۔
واضح رہے کہ عورت کے لیے نماز میں چہرے، دونوں ہتھیلیوں اور دونوں قدموں کے علاوہ پورا بدن ڈھانپنا ضروری ہے، ورنہ اس کی نماز نہیں ہوگی، لہذا اگر ساڑھی اس طرح پہنی جائے کہ اس سے پورا جسم چھپ جائے تو ساڑھی پہن کر نماز پڑھنا درست ہوگا، ورنہ نہیں۔