سوال: مفتی صاحب! بچپن میں میرے والدین نے مجھے قرآن مجید حفظ کروا دیا تھا، مگر پابندی کے ساتھ نہ پڑھنے کی وجہ سے میں اب قرآن مجید بھول چکا ہوں، میں نے سنا ہے کہ قرآن کریم پڑھ کر بھلا دینا بہت بڑا گناہ ہے، کیا یہ بات صحیح ہے؟ اور اگر یہ صحیح ہے تو اس سے بچنے کا کفارہ کیا ہے؟

جواب: واضح رہے کہ قرآن شریف حفظ کرنے کے بعد بھول جانا بہت بڑا گناہ ہے، احادیث میں اس کے بارے میں سخت وعید آئی ہے،
رسول اللہ ﷺ کا ارشادگرامی ہے:
عرضت علی ذنوب امتی فلم ار فیھا ذنبا اعظم من سورۃ او ایۃ من القراٰن اوتیھا رجل ثم نسیھا۔(سنن ابی داؤد)
ترجمہ:
مجھ پر میری امت کے گناہ پیش کیے گئے، سو میں نے ان میں کوئی گناہ اس سے بڑھ کر نہیں دیکھا کہ کسی شخص کو قرآن کی کوئی سورت یا آیت عطا کی گئی ہو، پھر اس نے اس کو بھلا دیا ہو”۔
پس قرآن کریم کو بھلا دینے کا تدارک یہی ہے کہ ہمت کرکے از سرنو دوبارہ یاد کرے، اور باقاعدگی سے پڑھتا رہے، تو ان شاءاللہ قرآن مجید بھولنے کا وبال نہیں ہوگا۔