سوال: عیدالفطر کے موقع پر بڑے حضرات بچوں کو، فیکٹری والے ملازمین کو، مالک نوکروں کو کچھ رقم عیدی کے طور پر دیتے ہیں، اور یہ رسم سی بن گئی ہے، عیدی نہ دی جائے، تو لوگ برا مناتے ہیں، پوچھنا یہ ہے کہ بڑوں کا اپنے ماتحتوں کو عید الفطر کے موقع پر بھی عیدی دینا جائز ہے، بدعت تو نہیں ہے؟

جواب: واضح رہے کہ عید الفطر کے دن چونکہ عیدی خوشی کے اظہار کے لیے تحفہ کے طور پر دی جاتی ہے، اس لیے عید الفطر کے موقع پر بڑے حضرات کا بچوں کو، فیکٹری والوں کا ملازمین کو، اور مالکان کا نوکروں کو عیدی دینا شرعاً جائز ہے، البتہ کسی سے اس کی خوشی اور رضامندی کے بغیر زبردستی عیدی لینا، یا کسی کو اس نیت سے عیدی دینا کہ اس سے بدلے میں دوگنی عیدی وصول کرے گا، یہ دونوں صورتیں شرعاً جائز نہیں ہیں، اور اگر اسلامی عبادت یا سنت سمجھ کر نہ کرے، تو بدعت کے زمرے میں بھی نہیں آئے گا۔