سوال: مفتی صاحب ! پوچھنا یہ تھا کہ گدھا، گھوڑا اور خچر پہلے حلال تھے یا حرام اور اگر حلال تھے، تو کب حرام ہوئے؟

جواب: 1)۔ گدھے کے متعلق تفصیل یہ ہے کہ یہ ابتداء میں حلال تھا، مگر غزوہ خیبر کے موقع پر آنحضرت صلی اللہ علیہ وسلم نے پالتو گدھے کے گوشت کو کھانے سے منع فرما دیا تھا، اس لیے پالتو گدھے کا کھانا حلال نہیں ہے، البتہ وحشی گدھا جس کو نیل گائے کہا جاتا ہے، اس کا کھانا حلال ہے۔
2)۔ گھوڑے کے متعلق حکم یہ ہے کہ گھوڑے کا گوشت فی نفسہ حلال ہے، البتہ آلہ جہاد ہونے کی وجہ سے اس کا کھانا مکروہ تحریمی ہے۔
3)۔ خچر کے متعلق حکم یہ ہے کہ چونکہ خچر گدھے اور گھوڑے دونوں کے ملاپ سے پیدا ہوتا ہے، لہذا یہ حلت اور حرمت میں ماں کے تابع ہوگا، یعنی اگر گدھی کے ساتھ گھوڑا جفتی کرے، اور اس سے خچر پیدا ہو، تو وہ ماں (گدھی) کے تابع ہوکر حرام ہوگا، لیکن اگر گھوڑی کے ساتھ گدھا جفتی کرے، اور اس سے خچر پیدا ہو، تو وہ ماں (گھوڑی) کے تابع ہوکر حلال ہوگا، (اگرچہ مکروہ تحریمی ہے)۔