سوال: سوال یہ ہے کہ اگر نماز پڑھتے وقت جمائی آجائے تو نماز میں جمائی لینا کیسا ہے، کیا اس سے نماز ہوجائے گی یا دوبارہ پڑھنا پڑے گی؟

جواب: نماز پڑھنے کے دوران جمائی لینا مکروہِ تنزیہی ہے، لہذا جہاں تک ممکن ہو، جمائی کو روکنے کی کوشش کرنی چاہیے، البتہ اگر مجبوری میں احتیاط سے اس طرح جمائی لی کہ جس سے آواز پیدا نہیں ہوئی تو اس سے نماز پر کچھ اثر نہیں پڑے گا، لیکن اگر بے احتیاطی میں منہ سے جمائی کے دوران ایسی آواز نکلی جس سے حروف (جیسے آہ، ھا وغیرہ) پیدا ہوگئے تو اس سے نماز فاسد ہوجائے گی۔
نیز واضح رہے کہ نماز میں جمائی کے دوران قیام کی حالت میں دائیں ہاتھ کا اندرونی حصہ منہ پر رکھنا چاہیے اور اگر قیام کے علاوہ کسی اور رکن میں ہو تو بائیں ہاتھ کی پشت کا حصہ منہ پر رکھنا چاہیے۔