سوال: السلام علیکم، مفتی صاحب! ہماری دکان کی طرف ایک عیسائی عورت ہے جو جھاڑو اور صفائی کا کام کرتی ہے، اس کا شوہر یا کوئی بیمار ہوتا ہے تو یہ کہتی ہے کہ مجھے کچھ پیسوں کی ضرورت ہے، ہم سو دو سو روپے اس کو دے دیتے ہیں، ابھی عیسائیوں کی عید تھی تو وہ مجھ سے سو روپے لے کے گئی تھی کہ مجھے کپڑوں وغیرہ کی ضرورت ہے تو میں نے اخلاقاً اس کو سو روپے دے دیے، میرے دل میں کوئی تعظیم نہیں تھی۔ کبھی ایسی صورت پیش آجایا کرے تو ہمیں کیا کرنا چاہیے؟ رہنمائی فرما دیں۔

جواب: کرسمس عیسائیوں کا مذہبی تہوار ہے، اس لئے اس دن کی تعظیم یا احترام والے کاموں سے بچنا شرعا ضروری ہے، لہذا ایسے موقع پر عیسائیوں کے ساتھ ہدیہ اور تحفہ تحائف کا لین دین جائز نہیں ہے، البتہ مذکورہ صورت میں آپ چونکہ اپنی ملازمہ کو عام دنوں میں بھی پیسے دیکر تعاون کرتے رہتے ہیں، اس لئے اگر اسے اس دن ضرورت ہو تو اس کے ساتھ تعاون کرنے کی گنجائش ہے، کیونکہ تعاون کی مذکورہ صورت میں اس دن کی کوئی خصوصیت نہیں ہے، تاہم بہتر یہ ہے کہ اس دن کی بجائے اس سے پہلے یا بعد میں تعاون کردیا کریں۔