سوال: مفتی صاحب ! حمد، نعت اور نظم وغیرہ کو گانے کے طرز پر پڑھنے اور کا کیا حکم ہے ؟

جواب: رسول اللہ صلی اللہ علیہ وسلم کی تعریف کرنا، ان کے اوصاف حمیدہ کا بیان کرنا، حسن وجمال بیان کرنا یا آپ سے محبت وعقیدت کا اظہار کرنا جائز، بلکہ کار ثواب اور سرمایہ آخرت ہے۔
البتہ نعت یا نظم کو گانوں کے طرز پر پڑھنا اور اس کے ساتھ ساز اور موسیقی کو شامل کرنا تعلیماتِ نبوی صلی اللہ علیہ وسلم سے سراسر انحراف ہے، بلکہ آپ صلی اللہ علیہ وسلم کی شان میں ایک طرح سے گستاخی ہے۔ حدیث شریف میں آتا ہے: قال النبي ﷺ : " إن الله تعالى بعثني رحمة للعالمين وهدى للعالمين وأمرني ربي عز وجل بمحق المعازف والمزامير الخ
ترجمہ: اللہ تعالی نے مجھے تمام جہان کے لیے رحمت بنا کر بھیجا ہے اور مجھے تمام جہان کی رہنمائی کا ذریعہ بنایا ہے، اور میرے رب نے مجھے باجوں اور مزامیر کو مٹانے کا حکم دیا ہے۔
لہذا نعت رسول مقبول صلی اللہ علیہ وسلم کے ساتھ ساز ملا کر پڑھنا، یا ساز ملائے بغیر گانے کے طرز پر پڑھنا، جس سے گانے کی طرف دھیان جائے یا گانے کی لذت محسوس ہو شرعاً جائز نہیں، ایسی نعت نظم پڑھنے اور سننے سے اجتناب کرنا لازم ہے۔