سوال: میں نے بعض حضرات کو دیکھا ہے کہ وہ اذان کے بعد وسیلہ کی دعا میں "والدرجۃ الرفیعۃ" اور "وارزقنا شفاعتہ یوم القیامۃ" کا اضافہ کرکے پڑھتے ہیں، اس بارے میں کیا حکم ہے، کیا یہ اضافہ کرنا درست ہے؟

جواب: واضح رہے کہ احادیث مبارکہ میں صحیح سند کے ساتھ اذان کے بعد پڑھی جانے والی دعا کو صرف "وَعَدتَّه" تک نقل کیا ہے: "اللّٰهُمَّ رَبَّ هٰذِهِ الدَّعْوَةِ التَّامَّةِ وَالصَّلَاةِ الْقَائِمَةِ آتِ مُحَمَّداً الْوَسِيلَةَ وَالْفَضِيلَةَ وَابْعَثْهُ مَقَامًا مَحْمُوداً الَّذِي وَعَدتَّه" البتہ امام بیہقیؒ نے اپنی کتاب سنن کبری میں ’’انک لا تخلف المیعاد‘‘ کا اضافہ بھی صحیح سند کے ساتھ نقل کیا ہے، لیکن اس دعا میں "وَالْفَضِيلَةَ" کے بعد "والدرجۃ الرفیعۃ" اور "وَابْعَثْهُ مَقَامًا مَحْمُوداً الَّذِي وَعَدتَّه" کے بعد "وارزقنا شفاعتہ یوم القیامۃ" محدثین کے نزدیک ثابت نہیں ہیں، لہذا ان الفاظ کو دعا کو جزء سمجھتے ہوئے پڑھنا درست نہیں ہے، تاہم اگر کوئی شخص ان الفاظ کو اس دعا کا جزء قرار نہ دے اور ویسے ہی پڑھ لے تو اس کی گنجائش ہے۔