سوال: السلام علیکم، مفتی صاحب! میرا سوال یہ ہے کہ آج کل نوجوان نسل اور چھوٹی عمر کے بچےجن کو سمجھ ہے، وہ صبح سے لے کر رات تک پب جی گیم پر مصروف رہتے ہیں یا پھر سوشل میڈیا پر مصروف رہتے ہیں کیا شریعت کے حوالے سے یہ جائز ہے؟ اگر نہیں ہے تو کس طرح ان کو سمجھایا جائے کہ وہ باز آجائیں؟ مہربانی فرما کر جواب عنایت فرمائیں جزاک اللہ

جواب: واضح رہے کہ شریعتِ مطہرہ نے کھیلوں سے مطلقاً منع نہیں کیا ہے، بلکہ ایسے کھیلوں کی حوصلہ افزائی کی ہے، جن سے جسمانی فائدہ ہوتا ہو، جیسے: گھڑسواری، تیراکی، تیراندازی وغیرہ، اور ان کھیلوں کی حوصلہ شکنی کی ہے، جن میں لگنے سے وقت ضائع ہوتا ہو، اور دنیوی اور دینی کوئی فائدہ نہ ہوتا ہو، اور ایسے کھیلوں کو ناجائز قرار دیا ہے، جن کی وجہ سے حرام کاموں کا ارتکاب لازم آتا ہو۔
اگر موبائل فون یا کمپیوٹر وغیرہ پر گیم، فیس بک، واٹس ایپ اور دیگر سوشل سائٹ وغیرہ میں مشغول ہوکر کسی فرض و واجب کا ترک یا کسی حرام کا ارتکاب لازم آئے، تو یہ لھوالحدیث (ایسی اشیاء جو اللہ کی یاد سے غافل کردیں) میں داخل ہے، اس صورت میں اس کا استعمال کرنا جائز نہیں ہوگا، البتہ اگر اس کے استعمال سے کسی فرض و واجب کا ترک یا کسی حرام کا ارتکاب تو لازم نہ آئے، لیکن بے فائدہ استعمال ہو، تو پھر اس صورت میں اس کا استعمال لایعنی ہونے کی وجہ سے مکروہ ہوگا، کیونکہ یہ ایک بے فائدہ کام میں اپنی توانائی اور وقت کو ضائع کرنا ہے۔
خیال رہے کہ اولاد کی تربیت والدین کی ذمہ داری ہے، انہیں اس سے کسی صورت غفلت اور کوتاہی نہیں برتنی چاہیے، اس سلسلے میں بچوں کو نرمی سے سمجھایا جائے، اور وقت پڑنے پر مناسب سختی بھی کی جائے، نیز بچوں کی رہنمائی ایسی متبادل تفریحات کی طرف کی جائے، جس سے بچے کے وقت کا مثبت استعمال ہوسکے۔