سوال: پیٹ میں گیس کی پرابلم ہے، کیا کرسی پر بیٹھ کر نماز پڑھ سکتی ہوں؟

جواب: سوال میں ذکر کردہ صورت میں اگر گیس کی بیماری اس قدر ناقابل برداشت ہے کہ مریض اس بیماری کی وجہ سے قیام (کھڑے ہوکر نماز پڑھنے)، رکوع اور زمین پر سجدہ کرنے پر قادر نہیں ہے، یا یہ ارکان باقاعدہ کھڑے ہوکر ادا کرنے کی صورت میں بیماری بڑھ جانے کا اندیشہ ہے، تو ایسی صورت میں مریض کے لیے کرسی پر بیٹھ کر نماز پڑھنے کی اجازت ہے، اگرچہ اس صورت میں بھی افضل یہی ہے کہ کرسی کے بجائے زمین پر بیٹھ کر اشارے سے نماز ادا کرے۔
اگر مریض اس بیماری کی وجہ سے صرف زمین پر سجدہ کرنے پر قادر نہیں ہے، لیکن باقاعدہ قیام ورکوع پر قادر ہے، تو اس پر کھڑے ہوکر قراءت کرنا اور کھڑے ہو کر رکوع کرنا لازم ہے، البتہ سجدہ کرسی پر بیٹھ کر ادا کرسکتا ہے۔