سوال: براہ کرم قرآن و حدیث سے عذاب قبر کے دلائل عنایت فرمادیں۔

جواب: عذاب قبر قرآن كريم كی کئی آیاتِ مبارکہ اور متواترصحیح احادیث مبارکہ سے ثابت ہے، لہذا اہلِ سنت والجماعت کا اجماعی عقیدہ عذابِ قبر کے برحق ہونے کا ہے، ذیل میں اس حوالے سے چند آیات اور احادیث مبارکہ ذکر کی جاتی ہیں:
۱)النار يعرضون عليها غدوا وعشيا ويوم تقوم الساعة أدخلوا آل فرعون أشد العذابo(سورۃ الغافر: آیت نمبر:46)
ترجمہ:آگ ہے جس کے سامنے انہیں صبح و شام پیش کیا جاتا ہے اور جس دن قیامت آجائے گی (اس دن حکم ہوگا کہ) فرعون کے لوگوں کو سخت ترین عذاب میں داخل کردو۔
امام رازیؒ اس آيت كى تفسير ميں لکھتے ہیں: ہمارے علمائے کرام نے اس آیت سے عذاب قبر کے اثبات پر استدلال کیا ہے، وہ فرماتے ہیں کہ یہ آیت تقاضا کرتی ہے کہ آگ ان پر یعنی فرعون اور اس کے آل و خاندان پر صبح وشام پیش کی جاتی ہے اور یہ آگ کا پیش کیا جانا قیامت کے دن ہونا مراد نہیں لیا جاسکتا، كيونكہ آگے اس بات کی وضاحت ہے کہ: وَيَوْمَ تَقُومُ السَّاعَةُ أَدْخِلُوا آلَ فِرْعَوْنَ أَشَدَّ الْعَذَابِ [غافر: 46] اور نہ ہی اس سے دنیا میں آگ کا پیش کیا جانا مراد لیا جا سکتا ہے، کیونکہ دنیا میں ان کے ساتھ ایسے نہیں ہوا، لہذا اس سے ثابت ہوا کہ یہ آگ کا پیش کیا جانا موت کے بعد اور قیامت سے پہلے ہوگا اور یہ آیت اس بات پر دلالت کرتی ہے کہ فرعون اور آل فرعون کے لیے قبر میں عذاب قبر ثابت ہے اور جب ان کے لیے عذاب قبر کا برحق ہونا ثابت ہوگیا تو دوسروں کے حق میں بھی ثابت ہوگیا، کیونکہ ان میں اور دوسروں میں فرق کا کوئی بھی قائل نہیں ہے۔
علامہ قرطبی فرماتے ہیں: اس آیت سے مفسرین نے "عذاب قبر"کے اثبات پر استدلال کیا ہے اور امام مجاہد، عکرمہ، محمد بن مقاتل اور محمد بن کعب سب فرماتے ہیں : یہ آیت "عذابِ قبر"کے اثبات پر دلالت کرتی ہے۔
۲) وممن حولكم من الأعراب منافقون ومن أهل المدينة مردوا على النفاق لا تعلمهم نحن نعلمهم سنعذبهم مرتين ثم يردون إلى عذاب عظيمo(سور ة التوبۃ: آیت نمبر:101)
ترجمہ:اور تمہارے ارد گرد جو دیہاتی ہیں، ان میں بھی منافق لوگ موجود ہیں، اور مدینہ کے باشندوں میں بھی۔ یہ لوگ منافقت میں (اتنے) ماہر ہوگئے ہیں (کہ) تم انہیں نہیں جانتے، انہیں ہم جانتے ہیں۔ ان کو ہم دو مرتبہ سزا دیں گے۔ پھر ان کو ایک زبردست عذاب کی طرف دھکیل دیا جائے گا۔
اس آیت کی تفسیر میں حضرت عبد اللہ بن عباس رضی اللہ عنہ، امام قتادہ اور حضرت حسن بصری فرماتے ہیں کہ دوسرے عذاب سے مراد "عذاب ِ قبر"ہے۔
۳)مما خطيئاتهم أغرقوا فأدخلوا نارا فلم يجدوا لهم من دون الله أنصاراo(سورۃ نوح:آیت نمبر:25)
ترجمہ:ان لوگوں کے گناہوں کی وجہ ہی سے انہیں غرق کیا گیا، پھر آگ میں داخل کیا گیا، اور انہیں اللہ کو چھوڑ کر کوئی حمایتی میسر نہیں آئے۔
امام رازیؒ اس آيت كى تفسير ميں لکھتے ہیں : ہمارے علماء نے اس آیت سے عذاب قبر کے اثبات پر دو طرح سے استدلال کیا ہے:
الف) "فَاُدْخِلُوْ "میں حرف فاء ہے، جو تعقيب مع الوصل كے ليے ہے، یعنی فا اپنے سے پہلے لفظ کے فوراً بعد ہونے پر دلالت کرتا ہے، لہٰذا مطلب یہ ہوا کہ آگ میں داخلہ غرق ہونے کے فوراً بعد ہوا اور اس سے آخرت كا عذاب مراد نہيں ليا جاسكتا ہے، ورنہ "فا" کی دلالت باطل ہوجائے گی۔
ب)"ادخلوا "فعل ماضی کا صیغہ ہے جو زمانہ ماضی (گذشتہ) میں ہونے کی خبر دے رہا ہے، لہذا یہ فعل اس بات پر دلیل ہے کہ آگ میں داخلہ ہوچکا ہے۔
احاديث مباركہ سے عذاب قبر کا ثبوت:
قبر میں عذاب اور فرشتوں کے سوال و جواب کے بارے میں احادیث متواتر ہیں اور بہت سے صحابہ کرامؓ اور صحابیات مثلاً :حضرت عائشہ، حضرت عمر بن الخطاب، حضرت عثمان بن عفان، حضرت زید بن ثابت، حضرت انس بن مالک، حضرت براء بن عازب، حضرت تمیم داری، حضرت ثوبان، حضرت جابر بن عبداللہ، حضرت حذیفہ، حضرت عبادہ بن صامت، حضرت عبداللہ بن رواحہ، حضرت عبداللہ بن عباس، حضرت عبداللہ بن عمر، حضرت عبداللہ بن مسعود، حضرت عمرو بن العاص، حضرت معاذ بن جبل، حضرت ابو امامہ، حضرت ابو الدرداء اور ابوہریرہ رضی اللہ عنہم اجمعین سے منقول ہیں۔
۱)حضرت عائشہ ؓ سے روایت ہے کہ ایک یہودی عورت ان کے پاس آئی اور اس نے عذاب قبر کا ذکر کیا تو کہا کہ اللہ تعالیٰ آپ کو عذاب قبر سے محفوظ رکھے۔ ام المومنین حضرت عائشہ ؓ نے رسول اللہ ﷺ سے عذاب قبر کےمتعلق دریافت کیا تو آپ ﷺ نےفرمایا:"ہاں عذاب قبر(برحق) ہے"۔ حضرت عائشہ ؓ نے فرمایا کہ اس کے بعد میں نےرسول اللہ ﷺ کو دیکھا کہ ہر نماز کے بعد عذاب قبر سے پناہ مانگا کرتے تھے۔ غندر کی روایت میں یہ اضافہ ہے کہ رسول اللہ ﷺ نے فرمایا:"عذاب قبر برحق ہے"۔(صحیح بخاری:حدیث نمبر:1372)
۲) حضرت ام مبشر رضی اللہ عنہا سے روایت ہے کہ جناب رسول اللہ ﷺ میرے پاس تشریف لائے، میں بنو نجار کے ایک باغ میں تھی، جس میں زمانہ جہالیت میں وفات پانے والوں کی قبریں تھیں تو میں نے آپ ﷺکو (باغ)سے نکلتے ہوئے یہ فرماتے ہوئے سنا: "عذاب قبر سے اللہ تعالیٰ کی پناہ طلب کرو" تو میں نے کہا:اے اللہ کے رسول ﷺ! کیا قبر میں عذاب ہوگا؟ تو آپ ﷺ نے فرمایا: "جی ہاں! مردوں کو قبر میں عذاب دیا جاتا ہے جس کو جانور بھی سنتے ہیں"۔(المعجم الکبیرللطبرانی:حدیث نمبر:268)
۳) حضرت انس ؓ سے روايت ہے كہ جناب نبی کریم ﷺ نے ارشاد فرمایا:" اگر تم مردوں کو دفن کرنا نہ چھوڑو تو میں اللہ سے دعا کروں کہ وہ تمہیں عذاب قبر سنائے"۔(صحیح مسلم :حدیث نمبر:2868)
اس تفصیل سے ثابت ہو اکہ عذابِ قبر برحق ہے، چونکہ یہ مسئلہ قرآن و احادیث متواترہ صحیحہ اور اجماع امت سے ثابت ہے، اس لیے اس پر ایمان لانا ضروری ہے، لہذا اگر کوئی شخص عذاب قبر سے متعلق قرآنی آیات اور احادیث کا بلا تاویل انکار کرتا ہو تو ایسا شخص کافر ہے اور دائرہ اسلام سے خارج ہے، البتہ اس عذاب كی تفصیلی کیفیت کا ہمیں علم اور ادراک نہیں ہے۔اللہ تعالیٰ ہمیں عذابِ قبر سے اپنی پناہ میں رکھے، آمین۔