سوال: السلام علیکم، مفتی صاحب! ایک بندہ نماز سے باہر تلاوت کررہا ہے، اور اس میں آیتِ سجدہ آتی ہے، مگر وہ بندہ اس وقت سجدہ تلاوت نہیں کرتا، بلکہ بعد میں دوران نماز اس سجدہ تلاوت کی نیت کرتا ہے، تو اب آیا اسکا اس طرح سجدہ تلاوت کرنا درست ہے؟ رہنمائی فرمائیں۔

جواب: واضح رہے کہ نماز کے باہر آیت سجدہ کی تلاوت کرنے کے بعد نماز میں سجدہ تلاوت ادا کرنا درست نہیں ہے، بلکہ اس صورت میں نماز کے باہر ہی سجدہ تلاوت ادا کرنا چاہیے۔
البتہ اگر کوئی شخص آیت سجدہ تلاوت کرنے کے بعد اسی مجلس میں نماز پڑھنے کے لیے کھڑا ہوجائے اور نماز میں بھی اسی آیت سجدہ کی تلاوت کرے، جس کی نماز سے باہر تلاوت کی تھی، تو اس صورت میں صرف نماز کا سجدہ تلاوت ادا کرنے سے نماز کے باہر کا سجدہ تلاوت بھی ذمہ سے ساقط ہوجائے گا۔